40 euskal idazlek Jainkoaz egindako hausnarketak

Joxe Arregiren 40 euskal idazlek Jainkoaz egindako hausnarketak

Joxe Arregik gogorarazten digu mendeak eta milurtekoak daramatzala gizadiak Jainkoari otoizka eta biraoka, dela eta ez dela gogoetan eta eztabaidan, Jainkoaren izenean bizitzen eta hiltzen. Eta galdetzen du: “Gu ote gara, hori guztia gezurra eta hutsa dela ohartu diren lehen adimen argituak?”. Hauxe da teologian doktore, Deustuko Unibertsitateko irakasle eta Hemen erlijio-gogoetarako aldizkariaren sortzaile eta zuzendariak buruan darabilen adigaietako bat. Eta hortik atera ziren euskal idazleei egin zizkien bost galderak ere: “Jainkoa: zer iradokitzen dizu hitz honek? Zein jainkorengan ez duzu sinesten? Zein Jainkorengan sinesten duzu, sinesten baduzu? Zer izen emango zeni(zki)oke? Nola irudikatuko zenuke? Non eta nola ageri da, ageri bada? Zer eta nola egiten du mundu honetan, ezer egiten badu?”. Berrogei erantzun jaso zituen, besteak beste, honako idazleenak: Laura Mintegi, Xabier Lete, Koldo Izagirre, Patziku Perurena, Piarres Aintziart, Uxue Alberdi, Pello Añorga, Pako Aristi, Jon Arretxe, JosAnton Artze, Joxe Azurmendi, Harkaitz Cano, Itxaro Borda, Junes Casenave, Sustrai Colina, Jean-Louis Davant, Edorta Jimenez, Unai Elorriaga, Pello Esnal eta Joxerra Gartzia.

«Jainkoa badela edo ez dela esatea ez da funtsezkoa»

Bakoitzari omen dagokio bere hautua. Zer da zuretzat Jainkoa?

Errealitatearen edo biziaren bihotzean konfiantza, ontasuna, arnasa eragiten duena da niretzat Jainkoa, izen horrekin edo izen hori gabe; beldurra, kaltea, larria eragiten duena ez da Jainko, ezta Bibliaren dogmaren izenez jantzita ere.

Zer dela-eta eskatu diezu euskal idazleei beren iritzia?

Deustuko Unibertsitateko Teologia Fakultatean ikerketa bat abiatu nahi genuen: zertan ote den gaur Jainkoaren auzia. Eta nik zer proposatuko nenbilela otu zitzaidan: zergatik ez gaurko euskal idazleei Jainkoaz galdetu? Atrebentzia zen, baina ez naiz damu. Jainkoaz galdezka larre joria gertatu zait niri, benetako pagotxa askotan. Galbahe xeheko irina ia dena.

Galdetu zenien guztiek erantzun al dizute?

Ez. Idazle on asko falta dira hor, nahiz eta nor den ona eta nor ez erabakitzea ez izan arazo samurra, Jainkoaren arazoa baino samurragoa izanik ere. Batzuek, nik eskatu eta beraiek nahi izan arren, ezin izan dute. Beste batzuengana iristeko biderik ez dut aurkitu, edo beraien gogoa pizten ez dut asmatu. Beste batzuengana, berriz, ez dut jo neure ezjakintasunagatik, eta horretaz bai naizela damu.

Arazo honetan, zer da funtsezkoena zeuretzat?

Ez da funtsezkoa Jainkoa badela edo ez dela esatea, Jainkoarengan sinesten dugun edo ez. Zer da funtsezkoa? Munduaren edertasunarekin hunkitzea, izakien oinazearekin kupitzea, hitzaren hondo isilean hondoratzea, errealitatearen barne ozenari eta zure izenari adi egotea. Besteen ondoan arnasa hondotik hartzea.