Abantaila bat badugu horretan ari garenok: aspertzeko betarik ez. Esaterako, har dezagun lau koadro t'erdiko txapelketa, edo aspaldi honetan antolatutako ia beste edozein lehia. Txapelketa ala torneoa? Euskadiko txapelketa? EAE? Euskal Herrikoa? Pentsatzekoa da txapelketa ofiziala izan dadin dagokion federazioaren araupean jokatu behar dela, ezta? Parte-hartzaile denak Aspekoak edo Asegarcekoak badira, irabazleak ba al du tokirik lehengo txapeldunen zerrendan? Ba al da bere maila erakusteko aukerarik gabe geratu den kirolaririk?

Kirola saldu beharreko produktua da, eta jakina, errazagoa da Buruz Buruko Txapelketa saltzea, Aspe eta Asegarceko Pilotarien Arteko Torneoa saltzea baino.

Eta urtean zehar jokatzen diren nazioarteko txapelketak? Nazioartekoak, Iparraldeko pilotariren bat tartean delako? Eta asturiar edo errioxar bat bada praka zuriak jantzita?

EHPK-k biltzen eta ordezkatzen al ditu gure pilotari afizionatuak? Ala Munduko Pilota Kontseiluak? Nazioarteko Pilota Federazioaren magaletik urrun antolatutako nazioarteko txapelketari, nolako arreta jarri beharko genioke? Handiagoa, “gureak” direlako? Edo txikixeagoa, ofizialtasunaren zigilua falta zaielako?

Zer tratamendu eman gure mugekin muga egiten duten herrialdeetako kirol taldeei eta kirolariei? Gureak? Kanpokoak? Informazioaren zerrendan Espainia-Ukraina garrantzitsuagoa al da Italia-Alemania baino? Alonso ala Hamilton da etxekoagoa? Noren etxeari buruz ari gara? Futbolari atzerritarrak Espainiako ligara “datoz” ala “doaz”?

Egin dezagun demagogia ariketatxo bat. Goitibera txapelketa antolatuko dugu. Ilusioz betetako gidari ausartak maldan behera botatzeko federazioaren beharrik ez dugunez, libre gara nahi dugun bezala deitzeko antolatu dugun lehiari. Zer iruditzen zaizue, Kontinente Arteko Goitibehera Txapelketa deitzen badiogu? Hamar lagunek izena ematen badute, bale gara!

“Galdera gehitxo eta erantzun gutxi, eta gainera, xestra jarri nahia”, pentsatuko duzu. Baina nonbaitetik lehertu beharra nuen. Besteak endredatu nahia barkagarria izan daiteke puzzle handi baten pieza txikiak garelako, baina geure burua engainatzea, ez.

Hitz aspertua utzi eta hel diezaiodan serio lanari, Galaxien Arteko Hirugarren Kanika Txapelketako txapeldun berriari elkarrizketa egiteko geratu naiz eta!