Medikuek albiste onak dakartzate logelatik. Sararen ama laster joan ahalko da etxera: bizi-konstanteak egonkorturik, bere onera etorri da Carmen. Anari Josefa amak biriketan odolbildua izan duela esan diote, baina desegitea lortu dute, eta emakumea egonkor dago. Dena den, ospitalean gelditu beharko du denbora batez, eta gero ere arta beharko du. Sara eta Ana pozik daude. Behin egoera egonkortuta, irtenbide bat ikusten dute. Ospitalera etorri zirenean zeuzkaten kezkak baino gehiago eramanen dituzte bertatik, baina pozik helduko diete berriz larrialdiagatik abandonatu behar izan dituzten laneko zein etxeko ardura arruntei.

Josefa ospitaleko barne-medikuntzako atalera eramatera etorri den Mikel andazainak irribarre batez agurtu du emakumea. Pedagogia ikasi arren, hamar bat urte egin ditu dagoeneko ospitalean lanean, behin- behineko kontratuekin beti. Orain dela hilabete batzuk oposizioak gainditu zituen, eta lanpostu finkoa bereganatu. Lan egonkorra lortu izana ospatzeko, irailean Lanzarotera joanen da, familiarekin. Gaur lanera zetorrela MP3ko irratian albisteak entzun ditu. Lehenik eta behin, Miguel Sanz berriro ere Nafarroako presidente izanen dela esan dute. Gero, jendeak hamabost eguneko oporraldiak hartu beharrean aste betekoak hartzen dituela, gorabehera ekonomikoak medio. Kanariar irlak ere aipatu dituzte, haietara berriro saldoka iristen ari diren etorkinei buruz mintzatzeko. Mikelek gogoan hartu ditu orain egun batzuk Miguel Sánchez-Ostizek idatzitako hitzak. Idazlearen ustez, benetako bidaia-kontaerak –benetako bidaiak– pobretasunetik ihesean eta haien herrietan ez duten erosotasunaren bila datozen etorkinen istorio epikoak dira.

Bitartean, Nellyk ez daki ezer oraindik, baina laster lanpostu egokia eskainiko diote. Ama ospitaletik irtetean, Anak pertsona bat bilatuko du, gurasoak etxean zaintzeko. Nelly boliviarrak pozik onartuko ditu Anak eskainitako lan-baldintzak, orain arte izan dituenak baino dezente hobeak direlako. 27 urterekin Bolivian gizonaren zaintzapean bost seme-alaba utzi dituen emakumeak hurbilago ikusiko du, posibleago, hiru bat urtean diru pitin bat egin eta bere herrira itzultzeko duen helburua. Anak soldata duina eskainiko baitio, gurasoak zaintzearen truke, eta logela bat. Paperik gabe segituko badu ere, Nellyk inoiz ezagutu duen bizimodurik egonkorrena izango du azkenik.

Josefari pilulak eman bitartean entzunen dio Nellyk, telebistan, Miguel Sanz presidenteari esaten Nafarroan egonkortasuna bermatze aldera hartu duela berriro gobernatzeko ardura. Nellyk ezer gutxi konprenituko du.