Zaizkigu jada denboraldiaurreko prestakuntza berezian. Bolumena oinarri, intentsitatea xede. Baina klubak biziarazten dutena ez da soilik kirola. Espainiako ligan aspaldikoak dira bestelako diru sarrerak, bazkide eta zaleen iturrietatik aparte lortzen direnak. Jokalarien salerosketaz gain, afera inmobiliarioak dira izarrak, zuzendaritzak berotzen dituztenak. 2005-2006koan ehunetik gorako milioi euro dira denen artean deklaratutako mozkinak, mila eta hirurehun bat milioi euro erabilita. Baina kluben artean ere klaseak egon badaude. Europako lehiaketetan parte hartu dutenen artean –Barça, Real Madrid, Valencia, Osasuna eta Sevillaren artean– %90 lortu zuten. Baina diru sarrera handienak lurren erosketak eta salmenten artean lortzen direnak ditugu. Merke erosi, birkalifikatu eta berriz saldu. Horretarako gobernuen konplizitatea da ezinbestekoa. Eta adibide eskandalagarriak ez dira falta. Valencia, Zaragoza eta Atletico de Madrid eredugarrienak. Real Madrid eta Barçak dituzten diru sarrera finkoak, elastikoen eta gainerakoen salmentaz gain telebisten eskubideak bereziki besteek ez dituztenek, holako finantzabideak bilatu behar dituzte maila berean lehiatuko badira. Eta zelaian txukun ibili ezkero gaitzerdi, oro estaltzen baitute garaipenek. Hauek ezean zorra etxean, eta zale suharra berme.