Donostiako Euskararen Udal Patronatuak www.merkatari.net web gunea jarri du abian. Hiriko merkataritza eta ostalaritzaren euskara beharrak asetzen lagundu nahi du tresna horrek. Hala, Euskararen Udal Patronatuak ematen dituen diru-laguntzen berri, testu laburrak itzuli, zuzendu edota zalantzak argitzeko zerbitzua, albiste buletina, hiztegiak on-line erabiltzeko aukera eta euskara lan esparruko idatzietan erabiltzeko Lanerako Idazkiak argitalpena jaso ditu atari berriak. Bestalde, zerbitzuen berri emateko 5.000 esku orri banatu ditu hiriko sektoreko profesionalen artean. Bestetik, sektoreko langileentzako oinarrizko euskarazko ikastaroak antolatuko ditu irailetik aurrera.