Opioa, morfina, heroina... sendi ederraren ama lobelarraren (Papaver somniferum) ahizpa da mitxoleta eta udaberria berotxo zapuzten denean lore, bazkalondoko lo-kuluxkarako amu sedante bikaina da. Badenean, eraman gabea dutenetan. Hondarretatik porlanak eraman ditu politikarien patrika zikinetara. Labore soroetatik herbizidek baztertu bide aldeetako zirrindetara. Euskal Herriko mendi Andiaren hego aldeko bidea hartu dut, gari-garagarrak itsasoaren erauntsitik artadiak babesten duenetik abiatu eta Ebroraino, Egan barrena. Ale soroak berde eta zainzurienak beltz, plastiko uhin. Alde gorrietako bideak aldamenekoek azagrarrei tarra (txepela), andosillarrei indioilar, karkartarrei argi-oilar eta san adriandarrei gaztain-ur deitzen dieten lurretara narama, errekete urdinek gorritu zituzten herrietara. Hemen bai, almendrondo eta olibondo barrokoteen babesean gorritzak, mitxoletadi latzak ageri dira. Haizeak petaloak etxeetako leihoetaraino daramatza. Itsasokada malko begi bila.