Gasteziko Artium museoko Ipar arteoan 1960tik aurrera jaiotako 35 argazkilari txinatarren 140 irudi jarri dituzte ikusgai, Zhuyi! (Erne!) izenburupean. Irailaren 23a arte bisitatu ahal izango den erakusketa eder horrek Txinak azken hamarkadetan izan duen bilakaera islatu du, Debekatutako Hiria, Harresi Handia eta Tiananmengo enparantza bezalako lekuetan hasiko den bidaian zehar. Horixe da erakusketa osatzen duten bost ataletan aurrenekoa: antzinako historia. Gainerako atalak Txinan gaur egun gertatzen ari diren aldaketen zuzeneko lekuko bilakatu dira. Era guztietako sentipenak biltzen dituen norbanakoaren aldaketen metaforak dira argazkiak; gizartearen sukar kontsumista gero eta handiagoak eragindako hutsunetik hasi eta herrialde erraldoi hartako kultur ohituren aipamenetan islatzen den malenkoniaraino.