Iruñerriko ikerketa Soziolinguistikoa izeneko azterlanaren emaitzak kaleratu ditu Nafarroako Gobernuak. Hiru hizkuntza eremuak biltzen dituen Iruñerriko herritarren erantzunak nabarmen dira euskararen aldekoak. Hona ale batzuk: inkestatuen %35,8ak haurrak D ereduan matrikulatuko lituzke, inkestatuen %80k baino gehiagok unibertsitatean eta Nafarroako Gobernuan euskara erabiltzea nahi du; eremu erdaldunean bizi direnen %71,7ak eremu mistoan egon nahi du. Iruñerritarrek eremu erdaldunetik mistora igarotzeko duten nahi horri erantzun dio Miguel Sanz Nafarroako Gobernuko presidenteak: ez du «inongo asmorik» Euskararen Legea aldatzeko.

Isidor Marí Universitat Oberta de Catalunya-ko Humanitate Ikasketen zuzendariak Quebec-ek eta Kanadak maiatzean sinatutako hitzarmena landu du gipuzkoaeuskara.net web gunean. Kanadak aitortzen du Quebecen hizkuntza eta kultura berezkotasuna eta aitortzen du baita ere, nazioarteko esparruetan present izan behar duela, barne desberdintasunak eta Quebecen nortasun berezia onartzeko gai den federalismo ireki eta asimetrikoaren espiritua aintzat harturik. Quebecek ordezkari iraunkorra izango du Kanadak UNESCOn duen ordezkaritzaren barruan. Marík hitzarmen hori dela-eta egindako hausnarketa honela bukatu du: «Batzuek gehiegitan begiratzen omen dugu Quebec aldera. Beste batzuek, berriz, hobe lukete aldian behin hara begira jarriko balira».

Euskararen Erakunde Publikoak Iparraldean 2007an hizkuntza politika egiteko ildo nagusiak aurkeztu ditu. Helburu nagusia euskal hiztun osoak sortzea izango da. Horretarako hainbat ildo prestatu dute, hala nola, familia, haur eta gazteak, hezkuntza (transmisioari dagokionez), aisialdia, bizi publikoa, hedabideak, argitalpenak eta toponimia. Zehar ildoak izango dira helduen irakaskuntza, kalitatea eta motibazioa. Hizkuntza politikaren aurretxostena Aholku Batzordeak aztertuko du eta abenduaren 21ean EEPko Administrazio Kontseiluak erabaki beharko du ea 2007rako ildoak eta aurrekontua onartzen dituen ala ez.

Euskararen etxean jarri dute, oraingoz 366 liburu dituen apalategia. Unibertsitateko Euskal Irakasleen Elkartearekin (EIRE) egin du hitzarmena Euskararen Etxeak eta liburuak fisikoki eta iraunkorki Bilboko egoitzan egoteaz gain, liburuen katalogoa interneten eta Euskararen Etxean bertan intraneten jartzeko asmoa dute.