Bertso berriak... Hurrengo geltokiari jarriak

Europaldean izarra
hari beha herri zaharra...
Orain eskuadra eta kartaboiz
ebakitzen du bizarra.

Urrutiko intxaur hotsa
herri gaztaina morkotsa...
Kanpoz moderno-nahiez jantzia
ta bere buruaz lotsa.

III

Muino-ordeken neurria
haizeak malgu gerria...
Mendiei zulo, zuhaitzei zerra
Aurrera doan herria.

Artaldeño bat bailitzan
zelaian hiru fenwitx han...
Lehen Y grekoak kale-borrokan
orain Eusko Jaurlaritzan.

Eder eztanda hurrean
baserri zaharra lurrean...
Expropiazio txostenak, koktel
legezkoen muturrean.

Egunak agur gabari
maldan gora bi garabi
kutxararaino lepoa luze,
lurra putreon haragi.

VII

Sagarrak gorri doi-doiak
porlan zakuak marroiak...
Rotazioa Lurraren kontran
hormigoian kamioiak.

VIII

Ebro hegoranzko soaz
errekastoak jasoaz...
Bat egindako burdin-Ybaiak
zein itsasotara doaz?

Huntza gorantza murruan
pankartak zintzilik gruan...
Batzuk «Primeran», batzuk arrastan...
gehientsuak tren barruan.

Biga eder arbol zaharrak
umatu ziren dolarrak...
Etxebizitzen garajeetan
AHT partikularrak.

Sustraiak hutsari heltzen
geroa galipot beltzen...
Giza jendea ari da hemen
bere oinei lurra kentzen.

XII

...Eta asfalto-hazi haien
kimuak zangotan aihen...
Homo Sapiens Sapiens-egiei
oinez ahaztu zitzaien.