Teherango kanpoaldean Behesht- e zahra hilerria dago. Iraken kontrako gerran (1980-88) hil ziren milioitik, 200.000 daude hilobiratuta bertan. Martiri bakoitzeko kristalezko kutxa bana dago, non hildakoaren argazkiarekin batera, bere objektu pertsonalak edota familiak utzitako edozein oroigarri ikus daitezkeen.
Hala ere, ez da kanposantua gerra bortitz haren oroigarri bakarra. Martirien irudiak, oso gordinak batzuk, kartel erraldoietan maiz ageri dira. Bestalde, telebista nahiz irratsaioetan, ia eguneroko gaiak dira soldaduen heroismoa edo hankak ebakitako beteranoen duintasuna bezalakoak.
Izan ere, apenas dago Iranen gerra hartan hildakorik izan ez duen familiarik. Gerra sufrimendua hain zabala izanik, Teherango gobernuak nazio sinbolotzat hartu du, haustura handia jasaten ari den herrialdea bateratzearren.