Galeperrak eskabetxean
Osagaiak:
8 galeper garbi
Tipulin bat, pikatua
Porru bat, pikatua
Azenario bat, xerratan moztua
Apioa, adaxka bat
8 baratxuri ale, osorik
3 koilarakada handi oliba olio
20 koilarakada ardo zuri
20 koilarakada Xerezko ozpin
Litro bat ur
20 koilarakada oliba olio birjina
Gatza
Gatza eman eta kazola batean, 3 koilarakada oliotan gorrituko ditugu galeperrak, alde guztietatik. Plater batera aterako ditugu ondoren. Kazola berean gozatuko ditugu gero baratxuriak, tipulina, porrua, apioa eta azenarioa. Barazkiak gorritzen hasi orduko sartuko ditugu berriro galeperrak, eta ardo zuria, ozpina eta ura erantsiko ditugu ondoren. Gatza eman, tapaz estali, eta ordubetean edukiko dugu kazola su ezti-eztian egosten. Galeperrak eginak dauden jakiteko, sutatik atera eta izterrak xamur dauden frogatuko dugu. Gutxienez 6 orduz utziko ditugu pausatzen, eta epelak edo giroko tenperaturan jango ditugu, sekula ere ez hozkailutik atera bezain laster. Eskabetxe-ura nahasi eta harekin batera jango ditugu galeperrak, edo patata egosien edo entsalada baten gainean garaztatuko dugu, hornidura gisa.
Kornixonak (pepino txikiak) nola maneatu
Normalean, ozpinetan jarritako kornixonak edo pepino txikiak hain dira goxoak, ezen aitaren batean jan ditzakegu denak. Baina aurretik maneatuz gero, are goxoagoak izango dira. Xukatu, katilu batean jarri eta oliba olio birjinaz eta ardo beltzaz busti. Gainetik, gainera, hauek gehituko dizkiogu: limoi baten azal birrindura, piperrauts min pixka bat, tipulin-zerrendak, baratxuri ale bat zuritua eta zapaldua, erramu hosto lehor pixar bat, perrexil hosto batzuk xehatuak eta eskura ditugun Arabiako lurrin gustuko guztiak. Oliba potzolo batzuk jartzen baditugu, are ederrago eta goxoago. Bakoitza molda dadila bere gustuko modua erabakitzen ozpin-pepinoak jateko. Horixe da hoberena.