Frantziak eta Espainiak terrorismo islamiarraren aurkako polizi ikerketarako lan talde bateratuak eratu dituztela eta, Espainian batez ere jatorri islamiarreko talde armatuen aurka aritzeko direla zabaldu da. Frantziako komunikabideetan, ordea, argi geratu da taldeok ETAren aurka ere jardungo dutela. Aspaldi ari dira elkarlanean Espainia eta Frantziako poliziak, baina oraingoan lan hori guztiz ofizialdua geratu da.

Datorren irailaren 30ean Pferd-Ruggeberg-Caballitoko langileek 11 hilabete beteko dituzte greban. Joan den astera arte mobilizazioetan eten bat egina zuten, enpresako zuzendaritzari beren negoziazio borondatea erakusteko eta bitartekaritzaren bat abian jartzeko borondatearekin, baina enpresak ez du onartu halakorik. Hitzarmen kolektiboaren negoziaketak piztu zuen greba eta harrezkero 115 langilek greban jarraitzen dute eta 76 lanean dira; beste 30 lan hitzarmen horretatik kanpo dira. Grebalarien ustez, adar jotzearekin erantzun die enpresako zuzendaritzak eta mobilizazioak iragarri dituzte.

Elkartasun Egunean iragarri zuen EAk maiatzeko EAEko hauteskunde autonomikoetara EAJrekin koalizioan joateko aukera zabalik zegoela. Orain iragarri eta datozen hilabeteetan, ohiko tira-biren ondoren, koalizioa nola gauzatzen den ikusiko da.

Sestaoko ontzioletako langileek berriz utzi dituzte irudi eta emaitza gogorrak hilabete gutxi arte ontziek protagonismo nagusia izan ohi duten lan eremuan. Aste hau eta etorriko diren ondorengoak ez dira errazagoak izango, areago Jose Luis Rodriguez Zapatero Espainiako Gobernuko lehendakariaren agindu hutsalak noraino helduko diren antzeman ondoren: 1982an bere alderdikideek sortu behar zituzten 800.000 lanpostu haiek bezain urrun seguruenik. Hauteskunde usain agerikoa utzi zuen aginduak, baina Ibaizabalen Ibar Ezkerrean behintzat, jokaldia bere aurkako gezi zorrotza bilaka dakioke. Bitartean, ontzioletako langileak beren lan etorkizun beltzarekiko arreta erakarri nahian dabiltza, eta lortu ere lortu dute, langile asko direlako, zalantzarik gabe, erabilitako bitartekoengatik eta Euskaldunako langileen borroka egunak oso gogoan dituelako 35 urtetik gorako edozein euskal herritarrek.

Uztailean jakin zuen Espainiako Sociedad Estatal de Correos y Telégrafos S. A. enpresak Kataluniako Gobernuak 30.000 euroko isuna jarri ziola. Merkataritza, Kontsumo eta Turismo Sailak 70 salaketa jaso zituen Kataluniako 800 bulegoetatik 20tan egindako hizkuntz eskubideen urraketaren ondoren. Katalanaren Legea 1998an jarri zen abian eta orduz geroztik Gobernuak hizkuntz eskubideak urratzeagatik jarritako isunik handiena da. Bederatzi enpresari jarri die isuna, guztira 43.216 eurokoa, Correos-ena barne.

Aurten bete ditu hamabost urte Nafarroako eta Arabako IKA euskaltegi sareak, 1989an sortu baitzen euskalduntze alfabetatzearen egitasmoarekin. Urtemugari lotuta, datorren urtarrilean erakusketa antolatuko dute euskaltegi sarearen hamabost urteko ibilbidea azaltzeko. Dagoeneko ikasturte berrirako dena prest dute urrian hasiko baitira eskolak ematen. Bestalde, IKAk web gune berria jarri du abian Interneten (www.ikanet.net) .

Bordeleko errektorearekin bildu dira Seaskako arduradunak, baina ez dira oso kontent atera bilkuratik. Seaskarako baliabide gehiago eskuratzea Frantziako hezkuntza nazionalaren dimentsioan kokatu behar dela erantzun die eta eskualde guztien artean bermatu behar dela berdintasuna. Beraz, zeharo itxita ez dagoen ate bakarra Hezkuntza Ministerioarena da. Erronka horri heldu beharko dio Seaskak izendatu berri duen lehendakari berriak, Ixabel Xarritonek. Lan arrazoiak direla medio Filgi Claveriek kargua utzi du.