Ikuspegi pertsonaletik min handia ematen dit, pena, oroitzapen asko. Baina era orokorragoan aztertuta, hura PPk ondo aurreikusita zuen ildo baten hasiera besterik ez zen izan. Argi zuten herri honek dituen erreferentziak apurtu behar zituztela eta horri ekin zioten, erreferentzia politikoak, kultur mailakoak, hezkuntza mundukoak... eta bereziki ezker abertzaleak bultzatu dituen erreferentzien aurka jo dute. Gure aurka jo aurretik, ezker abertzaleko beste enpresa batzuen aurka ere jo zuten. »Zer uste zuten, ez ginela ausartuko?«, esan zuen Aznarrek eta, bistan da, zorrotz ausartu dira. Ikusi zuten egunkari bat itxi eta ez zela ezer gertatu; beraz, gero etorri den guztia etorri da. »Egin« en aurkako eraso asko izan dira bere sorreratik, UCDk bere saioa egin zuen, PSOEk ere bai, EAJk ere kriminalizatu gintuen Atutxa eta Ardanzaren ahotik, eta azkenean PPk borobildu zuen jokaldia. »Indarra da zuzenbidea« zioen Canovas del Castillok, eta hori da egiten ari direna.