Jon Aranok, Gontzal Agotek eta Daniel Martiartuk honako artikulua idatzi zuten euskarazko argitarapenekiko egun dauden hainbat jarrera kritikatuz. Testua «Gara»n argitaratu zen lehengo astean:
«(...) Zer edo zer, irakurtzen ote du gure jendeak euskaraz? Euskaldunen artean, testu oso kaletarrak eta pizgarriak interesatuko zaizkien milaka batzuk ez ote dira? Kalera jaisteko maldan gora egin beharra al dugu? 30 urteren ostean, eta ehunka milaka ikastolakume hezi eta gero, porrota izan al da ikastola/ eskola/ uniarena? Irakasle, funtzionario edo kazetari izan ezean, inork ez du euskaraz irakurtzen, ala? Inguruan bertan ez al dugu ikusten euskaraz ikasitako helduak ere nahasturik daudela etengabeko arau aldaketekin? Euskaraz datorrena zerbait zaila eta aspergarria da, ez da kultura...?
(...) Gaur eguneko irakurlearentzat ari gara errebista-GKEok, ala biharko fraide-artxibo, Euskal Museo Bizidun edo Presente Abandonatuarendako eginkizunak hartu al ditugu? 700.000 boto (ustez) abertzale, Egunkariak 15.000 erosle eta kristo guztia prensa nacional del movimiento español irakurtzen? Liburu-tiradak 1.000 aletakoak eta gure jendea erdaraz irakurtzen euskal idazleak? Erakundeen diru laguntzak beharko al dira oraindik hemendik X urtetara? (...) «.