Lehengo astean amaitu ziren STEE-EILASen, Hego Euskal Herriko lau herrialdeetaraino iristen den irakaskuntzako sindikatuaren, 25. urteurrena ospatzeko ekitaldiak. Proiektu oro bezala, bere argi eta ilunekin, etorkizunera begira zutik jarraitzen du. Frankismoaren azken urteetan jaio zen, irakaskuntzako sindikatu bateratua izateko bokazioarekin eta garai hartako hezkuntza sistemari aurre egiteko asmoz Euskal Eskola Publikoaren alde egin zuen apustu. Sindikatu gazte eta borrokalaria, orduko gizarte mugimendu berrien eraginez (feminismoa, nazioartekotasuna...), irakaskuntza sindikatu alternatiboa izan nahi zuen. Euskararekin eta Euskal Herriko bakearekin konpromisoa hartu zuen, "banako eta taldeko eskubide guztiei zor zaien erabateko errespetutik abiatuta". Beste gizarte sektore batzuen aldarrikapenekin solidario izan da eta behar izan denean beti izan da kalean. Langileen eta herri honetako eskubideen defentsarako plataforma eta itunetan parte hartu du. Gaur, 25 urte geroago, gizartearen bizkarrezurra izango den eskola baten alde, sektore publiko indartsu baten alde eta gizarte honen garapenerako giltza den talde batentzat lan baldintza duin batzuen alde apustu egiten jarraitzen du. Horregatik guztiagatik zorionak eta aurrera!