EHNE euskal nekazarien sindikatua Bizkaian sortu zela 25 urte bete ziren azaroaren 27an. 25 urte nahikoak dira nekazal sindikatu batentzat behar bezala kontsolidatzeko eta ordezkatze, errebindikazio eta mobilizazio ahalmen labela eskuratzeko. Baserritarrei eskaini dien adore, irmotasun eta zerbitzuagatik, euskal nekazarien sindikatu hau euskal mapa sindikalaren parte bihurtu da jada. Herri honetako aldarrikapen politiko subiranistekin bat egiten eta egoerara moldatzen ere jakin du. Lan asko geratzen zaio aurretik, lehen sektorea egoera larrian baitago, baserriak leku askotan azkenetan dira ordeztuko duen belaunaldirik ez dagoelako eta ustiapenak errentagarri bihurtzeko bitartekorik ere ipintzen ez delako. Horregatik arrazoi sendoak dituzte sindikatu honetako arduradunek Administrazioari lurraren merkatu prezioan esku har dezan eskatzeko, gazteak nekazal jarduerara batu ahal izan daitezen; baita ustiapenak errentagarri bihurtuko dituen neurriak har ditzan eta lehen sektorea kontuan hartuko duen lurralde eta urbanismo antolamendu politika bat eskatzeko. Zorionak eta aurrera!