Euskal Herrian eta Espainiako Estatuko gainerakoan plantak dauzkaten automobilgintzako multinazionalen zuzendaritzetan, dagoeneko jo dute alarmek, beren autoen salmentak beheraka doazela ikusita, eta krisiaren kontrako estrategia berriak planifikatzen ari dira. Kasu batzuetan, jakina eta bistakoa denez, hala nola Nafarroako Volkswagenen eta Italiako Fiaten kasuetan, estrategia horien lehen urratsa lanpostuak desegitea da (500 enplegu finko Nafarroako plantan eta 8.000 baino gehiago Italiakoan). Espainiako Estatu osoan autoen salmentek izandako beherakadaz ematen ditugun ondoko datu hauek enpresek berek edo haien errepresentazioko elkarteek emandakoak dira, baina ezin dugu baliatu datu horiek baieztatuko, zehaztuko edo gezurtatuko dituen beste iturririk.

RENAULT: Europan ekaina bitartean akumulatutako auto salmentak 847.366 unitatera heldu ziren, %0,1eko beherakadarekin. Bi hilabete geroago, abuztua arte, haren salmentak %12 erori ziren Espainiako Estatuan, 110.648 unitatera heldu baitziren. Enpresa frantses horrek 5.020,4 milioi euro fakturatu zituen 2001ean, eta 37,6 milioi euroko galerak izan zituen.
CITROEN: Europan ekaina bitartean akumulatutako auto salmentak 464.594 unitatera heldu ziren, %0,2ko beherakadarekin. Bi hilabete geroago, abuztua arte, haren salmentak %6,9 erori ziren Espainiako Estatuan, 105.130 unitate produzitu baitzituen. Enpresa frantses horrek 4.462 milioi euro fakturatu zituen 2001ean, eta 84,2 milioi euroko mozkinak izan zituen.
PEUGEOT: Europan ekaina bitartean akumulatutako auto salmentak 692.742 unitatera heldu ziren, %3,8ko gorakadarekin. Espainiako Estatuan abuztua bitartean akumulatutako auto salmentak, ordea, %6,2 erori ziren, 102.812 unitatera heldu baitziren. Enpresa horrek 2.176,9 milioi euro fakturatu zituen 2001ean, eta 37,7 milioi euroko mozkinak izan zituen.
OPEL: Europan ekaina bitartean akumulatutako auto salmentak 723.835 unitatera heldu ziren, %15,6ko beherakadarekin. Espainiako Estatuan abuztua bitartean akumulatutako auto salmentak %14,5 erori ziren, 101.764 unitatera heldu baitziren. Enpresa horrek 5.179,5 milioi euro fakturatu zituen 2001ean, eta 80,6 milioi euroko galerak izan zituen.
SEAT: Europan ekaina bitartean akumulatutako auto salmentak %12,6 jaitsi ziren, 198.162 unitatera heldu baitziren. Espainiako Estatuan abuztua bitartean akumulatutako auto salmentak %15 erori ziren, 99.510 unitatera heldu baitziren. Enpresa horrek 5.963,4 milioi euro fakturatu zituen 2001ean, eta 233 milioi euroko mozkinak izan zituen.
FORD: Europan ekaina bitartean akumulatutako auto salmentak %3,7 erori ziren, 704.098 unitatera heldu baitziren. Espainiako Estatuan abuztua bitartean akumulatutako auto salmentak %2,4 igo ziren, 89.227 unitaterekin. Enpresa horrek 4.287 milioi euro fakturatu zituen 2001ean, eta 13,5 milioi euroko galerak izan zituen