Urtegiaren egoera aldatu egiten da urte sasoiaren arabera bizidunei dagokielarik. Uribarri-Ganboa urtegian eta inguruan 220 hegazti espezie inguru deskribatu izan dira, baina espezie ugaritasun hau ez dugu edozein urtarotan topatuko. Hegazti espezie ugarien, udazkenean agurtzen dira. Hezegune hau migrazio luzeen atsedenleku denez, negua baldintza onetan igaro nahi duten hegazti asko pasatzen da bertatik. Beraz, garai honetan, bertako espeziez gain, kanpotik datozenak gehitu beharko ditugu. Abuztu hasieratik azaro erdi aldera arte, urtegiko ur azalera eta inguruak, hegaztiz hornitzen dira, kumaldiaren ondoren neguko bizilekuetara zuzentzen direnak. Bizileku hauek, Espainiako hegoaldea, Sahara ingurua edota Afrika behealdea izan daitezke. Sahara aldera doazenak izaten dira goiztiarrenak, enarak, zikoinak eta lertxun edo gartzak kasu. Hauen atzetik, garrasika irteten diren antzar eta kurriloak edo grulak ikus genitzake, negua ate joka dugula berri emanez.
Kopuru aldetik aldiz, espezie bereko hegazti gehien, neguan topatuko dugu. Europa iparraldetik datozen hegaztiak, bertako baldintza gogorretatik ihesi, Gasteizera inguratzen dira. Ez dugu esango Gasteizen hotzik egiten ez duenik, baina goiko latitudeetako herrialdeekin alderatuz, tropikoa dela esan genezake. Ubarroi, lertxun, kaio, murgilari, zertzeta eta txiliportek urtegi honetan igarotzen dute negua. Uretako hegaztien kasuan, 17.000 ale ere zenbatu izan dira 1994an.
Inguruko zuhaixka eta sastrakaditan aberriz , zozo, txepetx, erregetxo eta kaxka beltzak topatuko ditugu. Txonta, birigarro, eta arabazozoek larre eta nekazal lurrak atseginago dituzte.
Negua igaro ondoren berriz ere udaberriko migrazioa dator. Aurreko migrazioan bezala, lehenak igarotzen Sahara inguruan zeudenak dira eta atzetik besteak. Udaberriko migrazioa urtarrila bukaeratik maiatza bitarte izaten da eta ez da hain ikusgarria izaten.
Uda, kumaldiarekin izaten da berezia. Murgilek, txiliportek eta kopetatxuriek habia bertan egiten dute. Aldiz noizean behin umatu izan dute ubarroi handiek, ahate mokozabalek eta murgilariek.
Hegazti espezie hauetako askok uretako habiak edota ur ertzetakoak dituztenez, beraien kumaldiek uraren mailarekin eta oszilazioarekin zerikusia dute. Urtaro hau guztiz interesgarria da. Hegazti askoren amodio kantak entzun daitezke eta baita zapelatzen ikuskizunak ere. Kopetatxuriak bata bestearen atzetik ibiltzen dira deskantsurik gabe eta zikoinek kanpandorreak estaltzen dituzte. Ondoren arrautzak zaindu beharko dira mimo handiz uda bukatzerako urtegia hegazti familiez betetzeko