Eguzkiak bazterrak berotzeari ekin dio, eta uda gainean dugunez, euskaltegietako eta erakunde euskaltzaleetako arduradunak barnetegiak, ikastaroak eta egonaldiak buru-belarri antolatzen ari dira dagoeneko.

Ikasle askok aprobetxatzen dituzte udako oporrak euskara ikasten jarraitzeko eta barnetegietara joan ohi dira. Erakunde ugarik antolatzen dituzte barnetegiak, besteak beste, AEK, Zenbat Gara, Maizpide eta IKAk.
AEKkoek, adibidez, Euskal Herri osoan barreiaturik dituzten barnetegiak ikaslez bete nahi dituzte. Edonork izena eman dezake ohiko barnetegiotan oporrak euskaraz ikasten igarotzeko, betiere ondoko bi nahitaezko baldintzak betez gero: 16 urte edo gehiago izatea eta hirugarren urratsa edo ondorengoren bat ikasten aritzea. Euskal herritarrez gain, ez ziren gutxi izan aurreko urteetan Katalunia eta Espainiatik bertaratu zitzaizkigunak. Goizetan sei orduko eskolak izan ondoren, arratsalderako txalaparta, zeramika edo bestelako jardueren inguruko tailerrak aurreikusi dituzte AEKko arduradunek. Gainera, barnetegiak dauden herrietako lagunekin hartu-emanak izaten dira, eta, beraz, ohiko barnetegiek tokian tokiko euskalkiak ezagutzeko aukera ere eskaintzen dute.
Era berean, azken urteotan AEK-k berak antolatu familia barnetegiak arrakastatsuak izaten ari dira. Izan ere, familia osoa Foru, Zerain nahiz Oiartzungo barnetegietara joan daiteke, gurasoak klasean dauden bitartean begirale-hezitzaileek beren seme-alabak zainduko baitituzte. Lau eta hamabi urte bitarteko umeak dituzten familiak baino ez dira onartuko. Dena den, AEKko arduradun Nere Portillok ohartarazi duenez, "tankera honetako barnetegiak ez dira haurtzaindegiak, baizik eta senideen arteko harreman euskaldunak sendotzea helburu duten barnetegiak".

Kirola maite duten ikasleek, berriz, barnetegi ibiltarirako izena eman dezakete. Baldintza bakarra betetzea eskatuko zaie: gutxienez bosgarren urratsari dagokion euskara maila izatea. Alfabetatze eta Euskalduntze Koordinakundeak Euskal Herriko paraje ederrak zeharkatuko dituen ibilbide bat zehaztu du, eta ikasleek egunero ibilbidearen zati edo etapa bat beteko dute, atzetik furgoneta bat lagun izango dutelarik suertatzen diren beharrei erantzute aldera. Gauak kanpin eta ostatuetan igaroko dituzte.

Bestalde, euskalduntze prozesua amaitu dutenek bizkaieran eta zubereran sakontzeko aukera izango dute.
Zenbat Gara elkartekoak ere euskara ikasleei zuzendutako egonaldiak prestatu dituzte. Ikasleok Sakanako Bakaiku herrian hartuko dute ostatu, ondorengo hamabostaldietan: uztailaren 29tik abuztuaren 11ra, eta abuztuaren 12tik hil bereko 25era. Halaber, Bilbon euskara sustatzea helburu duen elkarteko antolatzaileek izena eman duten ikasleen mailaren arabera antolatuko dituzte klaseak. «Jendeak ondo pasatzen du, eta aurreko urteetako esperientzia errepikatzeko ematen du izena", dio Zenbat Gara elkarteko Maite Ordaxek.
Bestalde, IKAk antolatutako barnetegiak Nafarroako Zubietan, Leitzan eta Lesakan izango dira, eta 14 edo 19 egun iraungo dute. Eskola orduei dagokienez, barnetegi guztietan 90 ordu klase aurreikusi dituzte.
Lazkaoko Maizpide euskaltegi-barnetegiak, halaber, maila guztietako ikasleak hartuko ditu. Egonaldi bana prestatu dituzte uztailerako, abuzturako eta baita irailerako ere.

Hogei bat urte dira HABEk "Egonaldiak familia euskaldunetan" programa abiarazi zuela, eta aurten ere ez du hutsik egingo. Zazpigarren urratsa gainditu duen ikasle orok herri euskaldun batean oporrak igaro ditzake, betiere euskara eta, hala nahi izanez gero, tokian tokiko euskalkiak ikasteko. 18 eta 45 urte bitarteko ikasleen esku dago herria eta familia aukeratzea, baita egonaldia hilabete bakarrekoa ala bikoa izatea ere. Bizkaitarrak, arabarrak eta nafarrak izaten dira egonaldiotara gehien jotzen dutenak, baina Valentzia eta Kataluniatik ere euskaltzale asko etorri ohi da.

Familiei dagokienez, gutxienez lau kidez osatutakoak behar dute izan eta %70 euskalduna den herri batean bizi. Familiok, besteak beste, Aramaio, Ondarroa, Zarautz, Lesaka eta Isturitzen bizi dira. Egonaldiak iraun bitartean senideak ez daude euskara batuan hitz egitera behartuak. HABEren egonaldien arduradun Agurtzane Maizen esanetan, "familia ugarik uda oro ikasleak beren etxeetan hartzen dituzte, eta urteen joan-etorriarekin batera bi aldeen artean harreman estuak sortzen dira". Dena den, Helduen Alfabetatze eta Berreuskalduntzerako Erakundeak antolatu egonaldion helburua ez da soilik ikasleek euskara ikastea eta jende berria ezagutzea; izan ere, tokian tokiko herritarrekin hitz egitea oso aberasgarria izan ohi da, eta baita bertako ohiturak eta kultura ezagutzea ere