Batez ere, gauza eta ekintzen alde ezkutua edota izate anitza adierazi nahi izan dut. Izan ere, errealitatea konplexua da, poliedrikoa.esango nuke, ñabarduraz josita baitago. Errealitatea ez da uste duguna, ezta izatea gustatuko litzaigukeena ere. Forma orok duen itzal ezkutuaren atzean aurki daitekeenaren hasperenetan aurkitu ahal dugu, eta hasperen hauek argilunen zirrikituetan azaleratzen dira geuregana iristeko, itzalen ñabardura ezberdinak atzemanez sortzen dugularik gure errealitatearen irudia. Bada nik, errealitatearen alde ezkutu hori adierazi nahi izan dut liburuan.

Alde ezkutuaren irudia. Itzalaren sinboloa modu jakin batean erabili dut. Modu polisemikoan. Hau da, poema ezberdinetan adiera ezberdinak emanez. Esanahi anitza eta irekia duen irudia denez, norberak uste duena interpretatzeko aukera ematen du.

Osotasuna, ezereza, bizitza, heriotza, geroa, iragana, esperantza... Izan ere, barruranzko bidaia bat izan da nirea, barne-miaketa bat eta barne-bilaketa bat. Era berean, kanpoko errealitatean ezkutaturik edo begi-bistan hain argi ageri ez diren ekintza, gauza edo sentimenak arakatzeari ekin diot. Nolabait esateko, sumatze zoliaren eta zorrotzaren pertzepzioa litzateke nirea. Sumatze horren deskribapena hitzez, poesia bilakatuta. Kanpo errealitatearen lanbropean dauden gaiak motibotzat hartu, horietatik barneratze prozesua egiteko. Beharbada nire zenbait poema ez da oso ulerterraza, poema batzuk oso intimistak, akaso intimistegiak direlako.