"KAZETARITZA ONERA EKARTZEA DA NIRE ASMO BAKARRA"

n Dagoeneko lau aldiz espetxeratua izan zara. Zergatik hori?

Ni izan naiz demokrazia deitzen dioten honek bere lana egiteagatik azkenik espetxeratu dituen hiru kazetarietatik bat -Sabino Ormazabal eta Jabier Salutregi dira beste biak-. Gu kartzelaratuak izateko arrazoi bakarra, kazetari bezala egiten genuen lana izan da, eta beraz libre aterako gara hirurok, errugabeak garelako eta guri leporatzen diguten guztia zenbait epaile, politiko eta komunikabideren asmakeria hutsa delako, nire kasuan Espainiako Entzutegi Nazionaleko epaileek dagoeneko hiru aldiz erabaki duten bezala: errugabe nintzela. Orain guri gertatu zaigu, baina hurrengoan beste batzuei ere berdin-berdin gerta dakieke, eta oraindik duintasun apur bat duten kazetariek hausnartu beharko lukete ea zergatik lan egiten duten beren burua urkatzera behartuko dituen komunikabide horietan.

n Zer da "El periodista canalla"n azaltzen duzuna?

Kazetari bezala 33 urtez izan dudan eskarmentua eta jasan behar izan dugun errepresioa. Errepresio hori ezartzen zigun jendea salatzen dut, izen, abizen eta ekintzaz. Izan ere, orain demokrazia goraipatzen dabiltzan batzuk lehengo errepresore berberak dira.

n Mendekutzat har daitekeenaren beldurrik ez al duzu?

Ez. Nik hor agertzen dudan guztia egiazkoa eta frogagarria da. Eta hori guztia idazterakoan izan dudan asmo bakarra gure ofizio hau onera ekartzea izan da, ea kazetariok behingoan adierazpen askatasunari dagokionean gutxieneko etika bat berreskuratzen dugun. Esate baterako, berri bat egiaztatzeko orduan iturrien aniztasuna ziurtatzea nahitaezkoa dela, tokian tokiko ugazabek ezarritako pentsamolde bakarraren aurka joateko era bakarra baita.

.

«Kazetaritza onera ekartzea da nire asmo bakarra»