Euskaldunok lan eta ekonomia arloetan Madril eta Parisen menpe Jarraitzen dugu. Horregatik ezin ditugu begiak itxi orain, Madrilen, negoziazio kolektiboaren erreformarekin gertatzen ari denari, euskal langileriarengan eragiten baitio. Espainiako presidente Jose Maria Aznarrek iraila jarri du mugatzat patronalak eta sindikatuek erreforma negozia dezaten. Hilabete horretarako akordiorik ez badago, Espainiako Gobernuak berea ezarriko du. Gobernuaren inposaketa edo patronalaren eta sindikatuen inposaketa izan, ondorioak antzekoak izan daitezke euskal langileriarentzat. Itxura guztien arabera, Madrildik bultzatu nahi den negoziazio kolektiboaren erreformak, negoziazioa bereizteaz gain, Euskal Herriaren ikuspuntutik, erabakiak hartzeko euskal eremu laborala desagertaraztea bilatzen du. Hori lan harremanen euskal markoaren eta sindikatu abertzaleen aurkako sabotaia berria litzateke. Denbora gutxi geratzen da, eta uda gainera tartean da, sabotaia berri hori galarazteko. Sindikatu eta langile abertzaleek erantzun kolektibo azkarra antolatu beharko lukete.