Behi eroen gaitza alarma sozial handia eragiten ari da europar eta euskal gizartean. Gaitz honen kudeaketa eta administrazio publiko desegokia alarma hori areagotzen ari da. Gobernu ezberdinek, gardentasun eta informazio falta eta kasu askotan arinkeriarekin, guzti hori lagundu dute. Euskal kasuan, Eusko Jaurlaritza eta Nafarroako Gobernuak dagozkien analisiak egiterakoan nolabaiteko bizkortasuna agertu dute. Dena den, alarma sozialak dirau. Bitartean, abeltzain eta harakinek euren negozioa arriskuan ikusten dute, kontsumitzailea, segurtasuna eta babesa behar dituena, ez baita esaten diotenaz fidatzen. Hala, kontsumoa jaisten ari da, abeltzainek ezin dituzte abereak saldu eta harakinek ezin dute haragirik saldu. Abeltzainen eta harakinen negozioak kolapsaturik daude eta, arazoari konponbidea laster aurkitzen ez bazaio, horietako asko desagertu daitezke. Hori saihesteko, botere publikoaren betebeharra egoera argitzea eta kontsumitzaileari konfiantza eskaintzea da. Eta horretarako gai ez badira, dimiti dezatela, Alemaniako Osasun eta Nekazaritza ministroek bezala.