2001. urterako hazkuntza ekonomikoaren aurreikuspenak ugaltzen ari dira. Mundu ekonomia motelduko dela aurreikusten da, horren ondorioz gure ekonomia puntu bat jaitsi daiteke. Egoera berri horren zergatiak aztertzerako orduan, manipulazioan eror daiteke. Zentzu horretan uste dugu Adegi patronalak egindako balorazioa, atentatuan hildako Jose Ignacio Korta presidenteari errespetu osoa gordez, horretan erori dela. "ETAren indarkeriaren krispazio politiko eta instituzionalaren ondorioz" 2001. urterako egoera ekonomikoaren okertzea aurreikusten dutela adieraztea eta azpimarratzea estrategia testimonial batean sar daiteke, baina ez du datu objektiboen errealitatea jasaten. Talde armatua ekinean aritu den bitartean, euskal ekonomia %4tik gora hazten aritu da bai EAEn bai Nafarroan. Ekonomiaren geldotzearen benetako arrazoiak beste batzuk dira, hala nola euroaren etengabeko balio galtzea, prezio energertikoen igoera geldiezina eta barne eskariaren dezelerazioa. Gehiago eragiten dio ekonomiari gizarte bake ezak atentatuek baino.