Joan den astean arrantzale, baserritar, taxista eta garraiolariek lanuzte eta grebak egin zituzten gasolioaren prezioaren igoeraren aurka. Kaltetuenak greba egiten duten pertsonak dira, ez baitute soldatarik jasotzen. Dena den, grebak beste pertsona eta sektoreei ere egiten die kalte. Enpresa batzuek eten egin behar dute jarduna hornidura ezagatik, kontsumitzaileek elikagaiak eta karburanteak eskuratzeko zailtasunak dituzte, hiritarrak ez dira garaiz iristen lanera. Egia da. Sektore batzuen grebak beste sektoreak eta pertsonak kaltetzen ditu. Eta batzuk protesta egiten dute. Elkartasuna falta da eta berekoikeria eta indibidualismoa dago soberan. Berekoikeriagatik bakarrik babesa eman beharko genioke, gasolioaren prezio igoerak denongan eragiten baitu. Gobernuaren neurri horren aurka ari direnek gure begirune eta elkartasuna merezi dute. Beste sektoretako sindikatuek, gizarte mugimenduek eta hiritarrek elkartasun jarrerak agertu beharko lituzkete. Gasolioaren auziak denoi eragiten badigu, denok lagundu beharko genuke. Eta greba gure gain hartu beharko genuke elkartasunez.