Ez dakigu Euskal Telebistako arduradunek horrelakorik espero zuten, baina euskal jatorriko argentinar senatore baten ekimenez, Hego Amerikako lurralde honetako Senatuak "Canal Vasco" jasotzea interes publikotzat jotzea erabaki du.
EITBk Ameriketako euskaldunei so eratu zuen kanalak hemendik aurrera laguntza ofiziala izango du bere emisioetarako.
Ekimenaren bultzagilea Horacio Usandizaga da, Batasun Zibiko Erradikala alderdiko Santa Fe probintziako senatorea. Bere ustez, "Canal Vasco"k Argentinako euskaldunen historiaren gaineko begirada berria ahalbidetzen du eta "euskal etorkinek beren ohitura eta tradizioei denboran zehar eutsiz argentinar kultura aberatsago bihurtu" dutela aitortzen du.
Senatore erradikalaren esanetan: "Canal Vasco-ren emisioek herrialde honetako euskaldunen eta beren jatorriko lekuaren arteko lotura sendotzeko balio izango dute, batez ere, orain arte euskal kultura, tradizio, historia eta gizartearen garapenari buruzko informazioa jasotzeko zailtasunak zituztenei begira".
Ozeanoko alde honetan, EITBko arduradunen artean poza da nagusi, Jose Felix Azurmendi "Canal Vasco"ko zuzendariak dioen bezala, "honek gure seinalea benetan kulturala izan dadin lagunduko duelako, nahiz eta telebista orokor batek ezin dituen beste atal batzuk ere ahaztu".
Kazetariei dagokienez, Ameriketarako kanal honek bere albistegiak indartzea erabaki du Luis Barreiroren agerpenarekin. Hemendik aurrera, Teleberriko aurpegi ezaguna izan den kazetari honek Ana Urrutiarekin batera "Noticias para América" albistegia aurkeztuko du.
Urriaren 17an egingo da euskal kanalaren aurkezpena Buenos Aires-en, Kableko Operatzaileen Elkarteak antolatzen duen galan. Gogoratu beharrekoa da "Canal Vasco"k bertan esponsor edo laguntzaile lana betetzen duela.
Argentinakoaren aurretik, irailaren 19an Barakaldoko Sozial Antzokian grabatu eta 22an emititzekoa zen saioan hemengo euskaldunok kanal hau ezagutzeko aukera ere izan genuen, Argentinakoaren aurretik. Txoria, beraz, hemendik aurrera hegoamerikar ahoskeraz kantatzen ikusiko dugu.