Operazio kirurgikoetan begiaren mugimenduak jarraitu eta kontrolatu ahal izateko radar sistema bat erabiltzen duen laserra da gaur egun aurrerapausorik handienetako bat oftalmologiaren munduan, Fernando Castanera doktoreak adierazi duen bezala.
Laser Excimer Autonomous berriak (izena ere ponposo samarra du), kornea laser batekin eskobatu edo ikortu ondoren bere kasa sortzen diren begiaren mugimenduak kontrolatzen ditu. Horretarako Golkoko gerran satelite bidezko misilen jarraipena egiteko erabili zen teknikaren oso antzekoa erabiltzen du. Castanera doktoreak esan zuenez, sistema honekin kornearen kurbatura zuzendu eta ikusmenaren akats bat konpontzeko asmoz kornearen gainera egiten diren ebaki-saioak, "perfektuak" omen dira, nahiz eta begia bere kasa mugitu, radar sistema berriari esker, betiere operatu beharreko zonara apuntatzen baita.
Orain artean, begi-mugimenduak bideo bidez kontrolatzen ziren -Excimer Autonomous berri honek daramana baino sistema askoz ere fidagarritasun txikiagoa duena-, eta ebakiak ez ziren hain zehatzak izaten. Begi-mugimendua jarraitzeaz gain, ebaki-saio bakoitzean zuzentzen den miopia, hipermetropia edo astigmatismoaren graduazioa kalkulatzen du, une bakoitzean berregokituz, zuzenketa -hau da kornearen ebakidura- beti nahi den mailakoa izan dadin, %100 -eko zehaztasunarekin