Iragan ostiralean ospatu zen Laneko Segurtasun eta Osasunaren Nazioarteko Eguna. Euskal sindikatuek mobilizazioak egin zituzten patronalen eta Administrazioaren egoitzen aurrean. Egun horretara arte -aurtengo lehen lau hilabeteetan- 38 hildako izan dira Euskal Herrian lan istripuen eraginez. Lantokira joan edo bertatik itzultzean hil diren beste sei langile gehitu behar dira zerrenda horretara. Baja eragin duten 17.192 lan istripu izan dira Hego Euskal Herrian aurtengo lehen hiruhilabetekoan, hots, %18ko igoera izan da. Beraz, egun hau ospatzea baliogarria da istripu hauen arrazoiak eta erantzukizunak bilatzen diren neurrian. Eta erantzuleak ez dira soilik enpresak eta Administrazioa, baita sindikatu eta langileak ere. Badira, ordea, beste erantzule batzuk: fiskalak eta epaileak. Hauek kasu askoren azterketa egin beharko lukete, eta hauen aurrean salaketak aurkeztu beharko lirateke. Lan istripu asko delitu dira, fiskalek eta epaileek hauen atzetik egon behar lukete. Fiskal eta epaileek 38 hildako eragin dituzten lan istripu horiek aztertu al dituzte? Ez dago erantzulerik, ala?