Euskal herritarrok Madril edo Parisen erabakitzen den politika ekonomikoaren mende jarraitzen dugu. Horrek eragin zuzena du gure soldata eta pentsioetan edota erosten ditugun gai eta zerbitzuetan. Kontsumo Prezioen Indizea (KPI) estatistika indize hauetako bat da, gure boltsikoetan eragin handia duena. Joan zen astean ezagutu genuen otsailari dagokion Espainiako KPI. Hamarreko bat igo da urtarrilaz geroztik. Urtearteko inflazioa, hots, iazko otsailetik aurtengorakoa, jada %3an dago. Hobenduna, Espainiako Gobernuaren arabera, gasolinaren, gas naturalaren eta turismoaren igoera da. Eta gobernu kontserbadore guztiek bezala, langileen, datu horietan inongo errurik ez dutenen, soldata-moderazioa eskatzen dute. Enpresariei eskatu behar zaie beren prezioak modera ditzaten, inoiz baino mozkin gehiago ari baitira biltzen. Zentzurik ez lukeena, langileak eta sindikatuak egoera honen aurrean geldirik geratzea litzateke. Euren betebeharra, behar izanez gero presio sozialaz, negoziazio kolektiboetan soldatak berrikusteko klausulak exijitzea litzateke