Presoen eskubideen eta prozesu politikoaren alde duela bi aste Iruñean baraualdian egondako euskaltzale taldeak proposamen bat luzatu zuen: Euskalgintzaren Kongresu handi bat antolatzea. Euren ustez, «premia handia sentitzen da euskalgintzan, barne-eztabaida lantzeko eta euskalgintzaren etorkizunaz euskalgintzatik bertatik gogoeta egiteko». Kontseiluaren gidaritza eta kudeaketaz gauzatuko litzateke eta hainbat gai aztertuko lirateke. Euren ustez, urtebeteko epea egokia izan daiteke kongresuaren antolakuntza bideratzeko.

«Bai Euskarari» Akordioaren Plan Estrategikoaren diseinua iragan abenduan amaitu zen. Orain fase erabakigarria ireki da partehartzaile guztientzat, hemendik aurrera sinatzaileek finkatutako konpromiso horietatik zeintzuk jarriko dituzten martxan erabaki behar baitute. Hori dela eta, epe bat ireki zen planari alegazioak egiteko. Epea 15era bitartekoa zen, baina hilaren 31 arte luzatzea erabaki dute, hartara eragile guztien ekarpenak jaso eta behin betiko txostena osatzeko.

Ertzaintzako 7.224 kideetatik 1.777k euskara maila altua du, hots, % 24,6k. Maila ertaina dutenak ordea % 40ra iristen dira. Hala ere, ertzainen % 20k (1.513) baino ez dezake elkarrizketa bat arazorik gabe jarraitu. Eusko Jaurlaritzako Barne Sailak jakinarazitako datuak dira hauek. Bestalde, Botere Judizialaren Kontseilu Nagusiak (CGPJ) EAEko epaile euskaldunen datuak eman ditu ezagutzera. Honen arabera, dauden 180 epaileetatik 12k soilik hitz egin eta idatz dezakete euskaraz (% 6).

Anton Artiñano mediku eta euskaltzalea hil zen iragan astean. 1976an Ulibarri euskaltegia sortu zuen Bilbon. Euskal kulturaren mezenas gisa jokatzen ahalegindu zen Artiñano, eta azken urteotan Krutwigen egitasmoen bultzatzaile izan zen.