Sortzen euskal eskola publiko berriaren aldeko mugimenduak euskarazko adarretan 138 irakasle postu bete gabe daudela salatu zuen iragan astean. Administraziotik jasotako datuen arabera, euskal lerroan 214 plaza daude bete gabe, 8 lan utzialdian daude, eta 68 behin-behinean ari dira lanean. Ondorioz, 138 lanpostu bete behar dira estrukturalki. Hezkuntza Departamentuak, oraingoz bederen, ez dituela lanpostu horiek deituko eta erabakiaren atzean gutxi batzuen interesak daudela adierazi du Sortzenek. Euskaraz ikasteko eskubidea berma dezala eskatu dio halaber Hezkuntza kontseilari Lagunari.

EIRE Unibertsitateko Euskal Irakasleen Elkarteak legeztatze biltzarra burutu zuen iragan larunbatean Bilboko La Bolsa udal zentroan. Batzar horretan elkarte berriaren estatutuak eztabaidatu eta onartu ziren, baita elkartea juridikoki sortzeko beharrezko akta sinatu eta zuzendaritza izendatu ere.

Koldo Zuazo EHUko irakasleak «Deba ibarreko euskeria» izenburuko ikerketa lana aurkeztu zuen astelehenean Eibarren. Lehen kapituluan, Deba bailarako hizkeraren ezaugarriak aztertu ditu, hirutan banatuz. Bigarrenean, ondorioak biltzen dira; eta hirugarrenean, euskalki honen etorkizunaren inguruko hausnarketa. Ibarreko udalek kaleratu dute liburua eta 2.125 ale egongo dira salgai, 2.000 pezetatan.

2000 urteko maiatzaren 28an Balmasedan ospatuko da hurrengo Ibilaldia. «Mendez mende zubiak eraikitzen» lemapean, XXI. edizio honek euskarazko kalitatezko hezkuntza aldarrikatuko du, euskarak Enkarterrietan bizi duen egoera Bizkaiko ezkorrenetakoa baita.