Euskara maila aberasteko tresna berria jarri du kalean UZEIk: «Sinonimoen hiztegia». Elkarte honen lexikografia sailak egin du eta euren esanetan, «hutsune bati erantzutera dator». Hiztegi berriak, guztira, 23.285 sarrera ditu eta hitz bakoitzari hainbat informazio erantsi gaineratu diote: zein kategoria gramatikal duen, zein euskalkitan erabiltzen den eta zein erabilera mauka duen. UZEIk Elkarlanean argitaletxearekin kaleratu du eta aurki CD-ROMa ere salgai jarriko omen dute.

Arrasate Euskaldun Dezagun (AED) eta Txatxilipurdi Elkarteak aurtengo kolaborazio akordioa sinatu zuten iragan astean Arrasateko Udalarekin. Honen arabera, AEDk 8 milioi pezeta (320.000 libera) jasoko ditu –aurrez beste 33 milioiko dirulaguntza hitzartua zuen Arrasate Press eta Arrasate Telebista finantzatzeko– eta 23,9 Txatxilipurdik.

Helduen Alfabetatze eta Berreuskalduntze Erakundeak (HABE) 3.000 milioi pezetatik gora banatuko ditu 1999-2000 ikasturtean udal euskaltegi eta euskaltegi pribatuen artean. Lehenengoei 1.320 milioi dagozkie, 1.827 bigarrenei. Dirulaguntza hauek iragan astean onartu zituen Eusko Jaurlaritzak. Guztira 140 euskaltegi daude Euskal Autonomia Erkidegoan; 40 udalaren menpe daude eta gainerakoak pribatuak dira. Euskaltegi hauetan 1.809 irakaslek egiten du lan.

Justizia administrazioak euskararekiko duen jarrera salatu zuen pasa den larunbatean Euskal Herrian Euskaraz elkarteak (EHE). Bilboko Probintzi Entzutegiaren aurrean kontzentrazioa burutu zuen «Justizia sistema euskararen etsaia» lelopean.