Igande honetan, hilak 5, inauguratuko da ofizialki Urruñako ikastola. Lana gogotik egin dute bertako gurasoek, bai sos bilketa kanpainan, bai ikastola bera eraikitzen. Oztopoak ez dira gutxi izan, herriko auzapeza tarteko, baina azkenean ikastola errealitate bihurtu da. Kanpaina uste baino hobeto joan da eta hasiera batean 1.000 harri (10.000 pezetaren, 400 liberaren, truke) saltzea espero bazuten ere, erraz gainditu dute kopuru hori, ia 1.900 saldu baitituzte. Ostegun honetan bertan hasiko dituzte eskolak 2 eta 5 urte bitarteko 24 haurrek, baina inaugurazioa igandean goizeko 11etan izango da. Bertaratzen direnek ikastola barrutik ezagutzeko aukera izango dute, baita ondoren bazkaltzeko ere.

Iruñeko Ermitagaña auzoko 16 haurrek ezin izango dute aurten ere euren auzoan euskaraz ikasi. Nafarroako Gobernuak berriz ere ezetza eman dio D ereduko gela jartzeko eskaerari. Hezkuntza eta Hizkuntza kontseilari Jesus Maria Lagunak datorren ikasturterako (2000-2001) auzo honetan D eredua zabaltzeko aukera aztertzeko prest dagoela adierazi du.

Espainiako Barne Ministerioak ekainean martxan jarritako drogen aurkako kanpainako leloaren itzulpen okerrak («A tope sin drogas» gaztelerazko leloa «Atsedenik ez drogarik gabe» itzuli dute) ika-mika handia eragin du Euskal Herrian. ETB sartu zuen saltsan Ministerioak eta honek ez zuela itzulpenean zer ikusirik erantzun zion. Eusko Jaurlaritzak kanpaina erretira dezan eskatu dio Espainiako Barne Ministerioari.

Joxe Rojas internautaren «Hamaika ikusteko» izeneko webgunean «Eurolagun» programa aurki daiteke. Programa hau Macintosherako sortu du Rojasek eta euskara hutsez dago. «Eurolagun» programaren egitekoa pezetak eta liberak euroetara bihurtzea da.