Ofiziotan, zortziko txikian.

Zu, Xabier, Urkiolan zagozala Unai zure lagun hau eta ezkondua bera, hango harri famatuari bueltak emoten ikusten dozu.

Harri hau dala ta ez dala
hainbeste algara,
batzuk hor jotzen dabe
egun eta gaba,
baina zu ikusita
hauxe da ikara,
bigarrenaren bila
etorri al zara?

San Antoniok badeuko
horrenbeste ospe,
baina hain ona danik
nik neuk ez dot uste.
San Antoniori nabil
hemen kontu eske
andrea eskatu ta
sorgina emon deuste.

Ondo ikasita dot
aspaldian lana,
eta nik ondo dakit
askon panorama,
hainbestentzat egin dot
tontor hortan plana,
bakotxak eroaten dau
merezi dauana.

Honi buruz badago
hainbeste liburu,
eta bat irakurtzen
pasau doaz lau ordu;
hogei buelta emonda
polita seguru,
ta ehun emon ezkero
Ane Igarteburu.

Zure zoriona gaur
ez datortzu berez,
nahiz eta nik aukera
ipini hain errez,
San Antonio beti
dabil behar dan legez,
zuk ehun buelta emon dozuz
ta danak aldrebes.

Neu konturatu ez ta
hor sartu dot hanka,
ontxe bai egin dot nik
eder ta galanta;
bueltaka ta aldrebes
a zelako lata,
igual kuadrilakon bat
tokatuko jata.

Bakarka, hamarreko nagusian.

Hamar urtean egunero egunero joaten iza zara ospitalera, koman egoan zure semea bisitatzera. Gaur seme hau berbetan hasi da.
Hamar urtean bizitza eta
heriotz arteko helmuga,
zenbat unetan eduki dudan
negargura ta tristura.
Aterako zan edo ta ez zan
mediku guztiek duda;
baina azkenik zure koma hori
ez da pasatu puntura,
hamar urtetan nahi izan dudan
une gozoa heldu da.
Tunel iluna pasatu dugu,
baina hortxe irteera,
animoz gaindi aurkitzen naiz ni
ta poza daukat soberan;
gu biok gaurtik aurrera, noski,
pozikan biziko gera.
Aita hartu ta hortik joateko
izango duzu aukera,
bizi berri bat hasten baitzaigu
une hontatik aurrera.

Bakarka, berbea gaitzat hartuta, hamarreko nagusian.

Gripea.
Gripearekin asko ta asko
egoten dira penetan,
garraztasuna sentitzen baita
eztarrietan berbetan;
baina ez pentsa horrek ni jartzen
nauenik txarto ta ketan,
gustora asko hartutzen baitut,
jaunak, gripea benetan,
ikastolara ez joateko
azterketa egunetan.

Bakarka, lau oinak emanda.
Abertzaletasuna
ei doa GORANTZA;
gobernu abertzale bat
izango da, ANTZA.
Uxa ditzagun, bada,
hainbeste ZALANTZA,
eta jaso dezagun
gora ESPERANTZA.