Arraroa egiten al zaizue elkarrizketa kiroletako orrietarako beharrean telebistako orrietarako izatea?

Dagoeneko horrenbeste gauza egiten zaizkigu arraroak... Ohitzen ari gara gauza arraroetara.

Aurkezle lanak mendia bezalako klimaratzerik behar al du?

Oraindik ez gara hasi grabatzen, baina ez daukagu beldurrik. Gauza txiki bat denez, modu esperimentalean hartzen dugu, ea gure buruak nola ikusten ditugun... Gainera telebista mundua ez da guztiz berria guretzat, telebistan askotan egonak gara, baina hala ere beste gauza bat da.

Kangchenjunga igo aurretik edo ondoren erabakitako gauza izan da?

Ondoren izan da, etorri eta hurrengo astean izaniko elkarrizketan erabakitako gauza izan da.

Mendira joateko astia kenduko al dizue lan berriak?

Pare bat minutuko sarrera txiki bat egitea, eta ondoren bost bat minutuko agurra egitea besterik ez da izango gure telebistako lana. Bi hiru egunetan grabatzeko kontua da, hamar programak pare bat goizetan grabatuko ditugu; gidoia aurrez eginikoa da, nahiz eta gero gure modura kontatuko dugun. Printzioz udako hamar programetarako bakarrik da eta hortik aurrerako ez dugu ezer. Horrek mendira begira ez digu denborarik kentzen, ez dut uste ez onerako ez txarrerako izango denik. Gutxienez bizikletak ordaintzeko balioko digu.

Zein da zuek aukeratzearen arrazoia?

Ez dakit, agian azkenaldian komunikabideetan asko agertu garelako izan daiteke. Nolabait nortasun puntu bat eman gura zioten saioari.

Zein duzue mendirako hurrengo plana?

Hortxe gabiltza gauzak lotu guran. Asmoa irailean Nepal aldera joatea da, Xixabangma zortzi milakoa igotzera.

ARRITXU ZELAIA