"Nazioa eta autodeterminazioaren inguruko eztabaidarako prest gaude"

EBk ezkerreko erantzuna emanez jarraituko du bere ibilbidean
"Nazioa eta autodeterminazioaren inguruko eztabaidarako prest gaude"
Julia Madrazo, Bilboko Udalean Ezker Batuko zinegotzia
Ibilbide politiko laburra badu ere, Julia Madrazok kalean hartu duen kultura politikoaz hitz egin digu. Bilboko Udalerako Ezker Batuak aurkeztutako zerrendaburuak 30 urte ditu, abokatua da eta, egia esan, abizen ezaguna du, Javier Madrazoren arreba baita.
Udal politikari buruz hitz egiten hasi aurretik, Lasa eta Zabalaren hileten inguruan gertatutakoaz zure iritzia entzun nahiko nuke.
Ezker Batuaren iritzi publikoa adierazi dugu dagoeneko, baina argi dago Ertzaintzaren jokabidea gehiegizkoa izan zela. Carlos Bueren epailearen jarrera ez dakit legezkoa izan den baina ez da oso humanoa izan. Gesto por la Paz eta Anmistiaren Aldeko Batzordeek izan dituzten enfrentamenduei buruz zera esango nuke: bakoitza libre dela bere iritzia nahi duen orduan eta tokian emateko baina LAB, HB eta Batzordeen ekimen falta nabarmena adierazten dituzte kontramanisfestazio horiek. Kontramanifestazioek gehienetan konfrontazioa egoerak ekartzen dituztelako.
Zure ibilbide politikoa nahiko laburra da, hauxe duzu lehenengo ardura instituzionala. Nola ikusten duzu zure burua Bilboko Udaleko zinegotzi?
Zuk aipatzen duzunaren arabera, hau da, kargu instituzionala betetzen dudan lehendabiziko aldia da, baina nire ustez eta Ezker Batuaren planteamenduen arabera, politikaren arloa askoz ere zabalagoa da. Mugimendu sozial desberdinetan eta kale mailan ematen diren fronte desberdinetan aritu naiz. EILASeko abokatua izateaz gain, Salhaketa taldearen barruan ibilia nago, Rekaldeko auzo-elkarteetan jardun dut, San Frantzisko auzoan ari den abokatu talde batean ari naiz... Hori ere politika egitea da, bizitza instituzionalean eragina duten taldeak baitira. Gainera, esperientzia hau oso baikorra iruditzen zait, beste kargu publiko batzuek egiten dutenaren kontra, kalearekiko dudan harremana zuzena delako. Udaletxean ez naiz arrotz sentitzen kalean hartutako kultura politikoa landu baitut.
Sorpassoa PSOEren aurkako Izquierda Unidaren ofentsibaren izena dugu, baina nola itzultzen da hori errealitatean?
Ez da ofentsiba, eta ez da PSOEri aurrea hartzea ere. Gero eta argiago ikusten ari gara, PSOEk, nahiz eta kontrakoa esan, aurrera daraman politika eskuinekoa dela, horregatik gure erronka nagusia estatu mailan IU ezkerreko indar hegemonikoa bilakatzea da. Hau da, ezkerreko boto emaileek IU estatuan eta Ezker Batua Euskadin erreferentzia izatea. Gainera, PSOEk ez du eskuineko politika soila egiten, baizik eta ezkerreko baloreak kutsatzen ditu.
Euskal Autonomi Elkarteko azken udal hauteskundeetako datuak aztertuz gero, Ezker Batuak emaitza onak lortu ditu Ibar Ezkerrean eta gainerako zona industrialetan. Zona hauetan daude Ezker Batuaren baseak?
Urte askotako lanaren fruituak jasotzen ari gara, Ezker Batua ezkerreko erreferente bilakatu delako. Konfiantza honek egoera pribilegiatuan jarri gaitu. Ibar Ezkerrean, adibidez, egunero lan egiteko aukera ematen digu, aurrera egiteko aukera ematen digu.
Eta igoera hori ez al da PSOEk jaso duen zigor botoen emaitza?
Ez dut uste hala denik, orokorrean behintzat, nire ustez PSOEren boto asko PPra joan direlako. PSE-EEko boto emaile asko ez dira ezkerrekoak. Une batean PSEri botoa eman diote proposamen sendotzat jotzen zutelako, argi eta garbi.
Nire ustez Ezker Batuak HBren lana gustuko ez dutenen botoa ere jaso du eta, nola ez, orain arte abstentzioaren aukera hartu dutenek Ezker Batua hartu dute alternatiba bezala. Boto fidela izan arren, boto exigentea da eta ez da, noski, baldintzagabekoa.
Nolakoa da zure ustez, Ezker Batuaren boto emailea?
Mugimendu desberdinetan parte hartzen duen jendea da, sindikatuetan edota ekologian edota mugimendu bakezaleetan ibilitako pertsonak dira. Aldaketa gosea duten pertsonak dira, aktiboak, gardentasuna eta asanblea irekiak eskatzen dituen jendea da...
Eta horretan guztian non gelditzen dira Euskal Herriak dituen ezaugarri kulturalak, hizkuntza, desberdintasun izaera?
Egia da atal horretan defizitarioak garela, orain arte ez baitugu presentziarik eduki. Kontuan izan behar dugu herri honetan sentsibilitate desberdinak daudela eta honen ondorioz, sentsibilitate batzuek klase izaeraren alde jotzen dute, beste batzuek nazio eta abertzaletasunak dituen baloreak azpimarratzen dituzte. Hala ere, korronte desberdinak biltzen ditugu gure baitan. Gu beti agertu gara euskararen alde, hezkuntz ereduak direla eta administrazioaren euskalduntzea dela. Baina umiltasun osoz esaten dizut esfortzu berezia egin behar dugula euskara hizkuntza erabilia izan dadin eta denok euskalduntzeko.
Nazioa eta autodeterminazioaren inguruan ematen den edozein eztabaidarako prest gaude. Askotan esan dugu autodeterminazioaren alde gaudela, Izquierda Unidatik ere Estatu federala proposatzen dugun unetik.
Euskal Herriko mapa politikoak ez du zerikusirik Espainiako mapa politikoarekin. Zein hutsune bete behar du Ezker Batuak EAEko udaletan?
Eguneroko lanak erakutsiko du publikoki zein den beteko dugun hutsunea. Ez dut uste HB edota PSE-EEren menpe egon behar dugunik erabakiak hartzeko orduan. Gure helburua ezkerreko erantzuna ematea da.
Udal politika egiteko orduan, eta programak ikusita, ez da posible ezker abertzalearen planteamenduekin bat egitea? Nolakoak dira zuen arteko harremanak?
Hauteskundeak oso gertu ditugu oraindik eta egia esan ez dakit alderdien zuzendaritzen arteko kontaktorik izan den ala ez. Udal politikari dagokionez, ez dut uste beste alderdien menpe egon behar dugunik, lehen esan dizudan bezala. Kasu batzuetan HBrekin bat egingo dugu eta beste batzuetan Gorordorekin. PSE-EEk eta EAJk Bilbo irekiagoa eta partehartzaileagoa egiteko apustua adierazten badute, horren alde agertuko gara. Azken batean, ezkerreko eta progresistak diren ekimenen alde agertuko gara.
Ez al da Ezker Batua Madrilgo Izquierda Unidako irizpideen menpe geldituko?
Ez dut uste. Horretarako nahiko adibide ona dugu Legebiltzarrean izandako ibilbidea. Ez dugu inoiz Madrilgo Izquierda Unidatik deirik jaso ea zer egiten ari garen galdetzen. Programa komuna izan arren, nahiko libre ibili gara orain arte eta ez dut uste kontrakoa gertatuko denik.
Zein da zure iritzia Bilbo Metropolitarra plangintzaren inguruan?
EAJ eta PSE-EE aurrera eramaten ari diren plangintza erraldoia da. Bilbo banatzen ari dira ekonomikoki eta sozialki. Bilboko erdiguneak aberatsen hiria dela dirudi eta, aldiz, periferiak hainbat behar ditu. Amezola eta Abadoibarran etxebizitza sozialak ez egitea legeari kasurik ez egitea da. Ez dut uste politika horrekin bilbotarren beharrei erantzuten zaienik; espekulazioetan ibiltzeari, aldiz, eskandaluzkoa deritzot.
EAJk Bilbo proposatu nahi du 2000. urtean Kultura Hiriburu izendapena eskura dezan.
Lotsagarria da gaia aurkeztu den modua. Ortuondok uste zuen denok horren alde agertuko ginela, eta printzipioz ez da hain ideia txarra, baina forma aldetik akats asko izan ditu alkate jaunak. Hala ere, Ministro Batzordeak eskakizuna onartuz gero, lan handia dugu aurrera begira. Noski, ikusi beharko da baita ere nola banatzen diren udal aurrekontuak eta erabaki honek ezin du inolaz ere Bilbok dituen hainbat beharrei erantzuteko gaitasunean eragin.
GARTZIA, Myriam
8-10,11

Gaiez\Politika\Euskal Herr\Taldeak\Alderdiak\IU/EB
Gaiez\Politika\Euskal Herr\Erakundeak\Udalak
Pertsonaiaz\MADRAZO2
Egileez\GARTZIA3\Politika