"Ondasunean zati bat dibisetan inbertituta eduki behar da".
Norbaitek inbertsioren bat egiteko asmoa izanez gero beharko lituzkeen aholkuen bila jo dugu burtsa aholkulari honengana. 1.000.000 pezeta (40.000 libera) izanez gero eta diru kopuru hori duen pertsona baten ikuspuntutik abiatuta, aholkua eta egungo egoeraren azterketaren eske jo dugu Alberto Matillarengana. Hizpide izan ditugu joan den apiriletik hona inbertsiorik egin nahi dutenek kontuan hartu behar dituzten diru merkatuaren ezaugarriak, dibisen egoera eta hauei buruzko aholkuak, pentsio eta prebisio fondoak eta Altxor Publikoa, besteak beste.
Azkenaldian fondo garantizatuak jarri dira modan. Hauen abantaila da fondook epe jakin batean egin daitezkeela errentabilitate garantizatu batzuekin: ez duzu kapitala galtzen.
Beti ekonomia garatua duten herrialdeen dibisetan inbertitzeko gomendatzen dugu. Une honetan guk daukagun dibisa taldea, Europako Batasunaren eremuan, markoak, suitzar frankoak, Frantziako liberak, Danimarkako koronak... osatzen dute. Ikusten denez, moneta indartsuak dira, markoaren eremukoak. Beste eremu ekonomikoetan, amerikar dolarra, yena..., dolarraren eremuko monetak.