«Marketina Oronaren alorrik oinarrizko eta garrantzitsuena da»

Agustin Amasorrain, Orona kooperatibaren gerenteari elkarrizketa
«Marketina Oronaren alorrik oinarrizko eta garrantzitsuena da»
Agustin Amasorrain, Orona kooperatibaren gerentea
Egitura metalikoak eta igogailuak egiteaz gain, Oronak merkatuaren lege gogorrari aurre egiteari ekin dio. MCCko kooperatiba honek azken urteetan lortu duen arrakasta aipagarria da, 1986tik hona, adibidez, salmentak hirukoiztea lortu baitu. Krisi garai hauetan, atrintxeratze jarrera nagusia den bitartean, Oronak merkatuen erasoari ekin dio. Agustin Amasorrain gerentearekin aritu gara.
ARGIA. Une honetan MCCren fakturazio arrakastatsuena zerbitzu sailetik dator. Industria alorra aldiz, ez dago oso momentu onean. Orona salbuespena da. Zertan datza zuen arrakasta?
A. AMASORRAIN. Nik ez nuke esango Orona salbuespena denik. Gure aktibitate batzuk industrialak diren arren, zerbitzukoek ere pisu handia dute; horregatik, beharbada, krisiaren eragina ez da hain gogorra izan gure enpresan. Etxegintzak garrantzi handia du gure aktibitatean, eta aurreko urteetan lan asko egin da sektore honetan. Aurten, aldiz, lan honek behera egin du eta, nik uste, hurrengo bi urteak zailak izango dira Oronarentzat.
Gure arrakastari buruz, esango nuke gure lehendabiziko helburua lanpostuak sortzea izan dela, eta azken boladan ez dugu hazteko beldurrik izan. 50 lanpostu berri sortu ditugu urtero batez beste. Horri esker, merkatu kuota gehitzea lortu dugu. 1992ko salmentek 1986koak hirukoiztu dituzte.
A. Igogailuak egiteaz gain, beste mota bateko egitura metalikoak ere egiten dituzue. Ez al da nahikoa igogailuekin? Merkatuak behartutako irtenbidea da?
A.A. 1978an, Oronak egitura metaliko espazialak diseinatu eta egiteari ekin zion. Une hartan garrantzitsua zen, ohizko beste aktibitate bat, galdaragintza, pikutara joana zelako. Horrez geroztik ez dugu ia aktibitate berririk egin. Merkatu kuota gehitu eta produktu eta zerbitzuak dibersifikatzen saiatu gara batipat, aktibitatez aldatu gabe.
Zentzu honetan, dugun produktu berri bakarra eskailera mekanikoa da. Duela hiru bat urte produktu korear bat banatzen hasi ginen, eta aurten korearrak utzi eta mundu mailako lehena den enpresa alemaniar baten produktuak saltzen hasi gara.
A. Izugarrizko garrantzia eskaintzen diozue marketinari. Hernaniko dorre proiektua marketin operazio horietako bat da? Zein da marketinaren pisua Oronan?
A.A. Marketina enpresaren alorrik oinarrizko eta garrantzizkoena da. Produktuan ondo kokatzen bazara, eta kostoak kopetitiboak baldin badira, enpresa laster sendotuko da. Enpresaren beste oinarria pertsonalaren kalitatean datza; gure jendea ona da. Guk igogailu konplexuenak egin nahi ditugu eta hori posible da, multinazionalekin konparatuz enpresa txiki xamarra izan arren, MCC taldetik esperientzia baliagarria eta trinkoa jasotzen dugulako. Horrek indarra ematen digu.
Dorrea, bestetik, laborategi bat izango da funtsean, eta hortaz aparte teknikariak eta bezeroak erakartzeko balio badu, hainbat hobeto!
A. Zein da une honetan duzuen merkaturik erakargarriena? Beste produktu batzuei dagokienez, Europa al da esportazioetarako merkaturik egokiena?
A.A. Ez dago merkatu erakargarririk. Guk behintzat ez dugu merkatu berezirik ezagutzen, denak dira zailak. Europakoak izan daitezke errazenak eta hurbilenak, nahiz eta izan zailak diren. Konparazio baterako, gaur egun Afrika eta Hego eta Ertamerikan lan egitea ez da iraganean bezain erraza; ez dago diru errazik. Sakrifizio handiak egin behar dira lurralde horietan lan egingo bada. Ez nago ziur gure langileek beren soldaten zatitxo bat sakrifikatzeko gai ote diren, merkatu eta kultura horien aurrerabidean kolaboratzeko.
A. Beste kooperatiba batzuk ixten diren bezala, Irungo Guria adibidez, Orona oso ondo dabil. Zeintzuk dira etorkizunerako dituen aurrikuspenak?
A.A. Nahiko onak. Aurretik esan dudan bezala, datozen bi urteak zailak izango dira, ezbairik gabe, eta erabaki sendoak hartu beharko ditugu. Gure bezerorik handienek zera diote, eskaintza maila handitzen doala eta horrek lana ekarriko digula. Ezin etsiko dugu!
Myriam Gartzia
20-21

GaiezEkonomiaKooperatibaKooperatiba
PertsonaiazAMASORRAIN1
EgileezGARTZIA3Ekonomia