«Liburu txarrak egotearen errua maisu eta maistrena da»

Pamielako Xabier Etxaniz elkarrizketa haur literaturaren inguruan
«Liburu txarrak egotearen errua maisu eta maistrena da»
Xabier Etxaniz, Pamielako «Tamaina Txikia» sailaren arduraduna
ARGIA. Zein da, literatur ikuspegiari dagokionez, haur literaturaren egoera?
XABIER ETXANIZ.
Momentu honetan ez dago haur literatura bat, arlo guztiak ukitzen ari dira. Gaien arloan, oraindik korronte indartsurik ez badago ere, umorea eta fantasia dira gehien lantzen ditugunak. Gero eta gutxiago idazten da euskaraz eta itzulpegintza da nagusi. Aipagarriena hauxe da, sormen krisia.
A. Zergatik ez da idazten?
X.E. Idazleak gauza asko egiten ari dira, ez bakarrik idazten, itzultzen eta beste arloetan. Lehen behar handia zegoen, liburuak egin behar ziren. Beharra baretzen hasi da eta beste lan batzuetara jo da.
A. Diferentziarik ikusten al duzu, eskaintzaren aldetik, Espainiako argitaletxe handi eta bertakoen artean?
X.E. Batzuk merkatuaren jokoari erantzunez bakarrik ari dira produzitzen; beste batzuek inongo kontrolik gabeko itzulpenak egiten dituzte... Alde honetatik, bertako argitaletxeek gehiago zaintzen dute produktua. Dena dela, errua ez da argitaletxeena, erosleena baino. Maisu eta maistrei liburu txarrak egotearen errua eurena dela esan behar zaie. Egun batean, guztiok, horrela jokatzen duten argitaletxeen liburuak erosteari uzten badiogu, aldatu beharko dute jarrera.
A. Kalitate oneko haur literatura al dugu?
X.E. Gaztelaniaz publikatzen den maila hemen badagoela ikusten dut. Euskal Herrian best-seller-a dena, kanpoan ere bada. Nik uste dut zaintzekotan, edizioen eta itzulpenen kalitateari begiratu behar diogula.
A. Idazle gehiago edo irakurle gehiago: zein da arazo nagusia?
X.E. Hemen bidea ez da idazle gehiago egotea, irakurle gehiago egotea baizik. Nahiz eta azken urteotan gutxiago produzitu, badago non irakurri, aukera nahiko zabala da. Ez dakit, baina, irakurlerik badagoen, afizioz eta gogoz irakurtzen duenik.
J.J. Petrikorena
47

GaiezKulturaArgitalgintArgiteletxePamiela
PertsonaiazETXANIZ3
EgileezPETRIKOREN1Kultura