«Instituzionaldu egin behar da Opera Denboraldia»
Juan Jose Lopez de Maturana da ABAOko idazkaria
Martxoa bitarte burutuko da iragan astean abiatu zen ABAOren opera denboraldi berria. Juan Jose Lopez de Maturana da ABAO Bilboko Operaren Lagunen Elkarteko idazkaria, eta berarekin izan ginen 42. edizio honetako lehenengo kontzertuaren bezperan. Aurtengo denboraldia antolatzeko garaian izan dituzten xede nagusiak azaltzeaz gain, jende askorentzat ezezaguna den opera mundua aztertzeko parada eskaini zigun ia zazpiehun opera emanaldi ikusi dituen donostiar honek.
Beste edozein jarduera artistikotan bezala, jendeak ohitu eta ezagutu egin behar ditu gauza berriak. Zerbait gustukoa izateko lehenik ezagutu egin behar da, eta ez bada programatzen ez da ezagutzen. Zirkulu hori hautsi egin behar da. Opera berriak pixkanaka ezagutzera emanez, oso tradizionala den ikusleen hodeiertza zabalduz. Hau da ABAOren helburua.
Baina antolatzeko garaian aurrekontu izugarriak behar dira. ABAOk bultzatu du opera Euskal Herrian, eta sortu zenetik ezinbestekoak izan ditu dirulaguntzak. Antolatzaile bezala, arrisku ekonomiko handi bati aurre egin behar dio, hamar-hamabi egunetan burutzen zen jaialdi bat antolatzetik sei-zazpi hilabeteko iraupena duen denboraldia antolatzera pasatu garelako. Lehen, obra bakoitzaren emanaldi bakarra eskaintzen genuen, eta orain sei titulu berberekin hemezortzi egiten ditugu. 500 milioi pezeta behar dira denboraldia aurrera eramateko, eta ABAOk urtero izaten ditu aurrekontu eta antolaketa arazoak.
Instituzionaldu egin behar da opera denboraldia. Instituzioak, babesle enpresak, ABAO, publikoa, Arriaga Antzokia, hau da, operaren inguruan mugitzen den jendeak koordinatu, eta modu egoki eta finkoan jardun behar du ezagunak diren eta zehaztuta eta onartuta dauden konpromezuen bidez, operak egonkortasuna eta jarraipena izan dezan.
Eusko Jaurlaritzak oso ondo ulertu du guzti hau, eta Kultur Sailak erakunde guzti horiez osaturiko Bilboko Opera Kultur Elkartearen sorrera bultzatu du. Duela urte erdi gauzatu behar zuen proiektua, baina ez zen egin prozesuaren zailtasunak direla medio _asmo asko bateratu behar baitira_. Uste dut berriz ere martxan jarri dela, eta gauzatzen denean guztiz onuragarria izango da operarentzat.
Funtsean, kultura da opera. Kultur ikuskaria da, ez ikuskari soziala. Garai batean horrela izango zen, egoera ekonomikoa, politikoa eta soziala ezberdina zelako, baina orain kultur ikuskaria da. Zenbait ikusle joan daitezke dotore jantzita estreinaldietara, baina kultur arrazoiak direla medio joaten da ikusleen gehiengoa opera emanaldietara.