«EAJk bere eginkizuna modu zuzenean bete duelakoan nago»

Jose Luis Avila Orive, Hezkuntza Saileko kontseilariordeari elkarrizk
«EAJk bere eginkizuna modu zuzenean bete duelakoan nago»
Jose Luis Avila Orive, Hezkuntza Saileko kontseilariordea:
ARGIA. Nola baloratzen duzu joan den hil amaieran burutu zen prozesuaren bilakaera?
J.L. AVILA. Prozesuaren garapena oso positibotzat jotzen dut, azken batean hezkuntz sistemarentzat funtsezko aurrerapena suposatzen duelako, hots, behin-betirako ordenamendua, argi eta garbia, bi sare bakarretan: bat publikoa eta bestea pribatua. Era berean, 1987an hasitako bide luze baten helmuga dugu honakoa, non zentro publiko eta pribatuen bategiterako asmoa gauzatu den.
A. Badirudi inork ez dakiela zertan aldatuko den sare publikora pasatu diren ikastolen egoera. Zeintzuk izango dira aldaketa horiek konkretuki?
J.L.A. Ez da egia sare publikoa aukeratu duten ikastolek zein kondiziotan jardun behar duten ez dakitenik. Ikastola publiko guztiek sare horretako gainontzeko zentroek duten tratamentu bera izango dute.
Nabarmendu behar da administrazio publikoek onartutako pertsonala, irakasle zein ez irakasle asumituko dituztela, dagokien mailan; gainera, aurretik ematen ari ziren lerro eta mailak ematen jarraituko dute, eta autonomia zabalez garatu ahal izango dute beren aktibitatea, 1/1993 legearen barruan. Horrekin batera, irakasleen mugikortasun eskubidea errespetatu beharko den arren, 1996ko abuztuaren 31 arte bermatzen da beren irakasleen permanentzia.
A. Zer desberdintasun egongo dira, beraz, sare publikoko ikastola ohiak eta sare pribatuko ikastolen artean?
J.L.A. Galdera hori maitzaren 25aren aurreko arrazonamendu oinarrietatik abiaturik egina dago. Dagoeneko bi sare baino ez daudenez, ikastola publiko eta ikastola pribatuen arteko ezberdintasunak gainontzeko zentro publiko eta zentro pribatuen arteko berak dira.
A. Horrek ikastolen mugimendua desagertarazi al dezake? Ikastolek diote elkarrekin jarraitu behar dutela mugimendu gisa, eta Buesa sailburuak 25etik aurrera ikastolez ezin dela hitz egin adierazi du. Zer esan nahi du adierazpen horrek?
J.L.A. Bi galderak ezberdinak dira eta batez ere dibergenteak. Ikastola pribatuek nahi duten erako antolaketa izan dezakete, gainontzeko zentro pribatuek beren organizazioen bitartez egiten duten bezala. Zentro publikoei dagokienez, Hezkuntza Sailak elkarte baldintzak modu partehartzailean erabakiko ditu.
Bestalde, Hezkuntza Sailburuak eginiko eta lehen aipaturiko adierazpenek, maiatzaren 25etik aurrera ikastolen sarerik ez dela existituko esan nahi zuten, zentro publikoak eta pribatuak soilik egongo direla. Horrek ez du oztopatuko ikastola publikoen hezkuntz proiektuaren garapenaren jarraipena, beren nortasun eta ezaugarriz, 1/1993 legearen barruan beti.
A. Zer jarrera izango du Hezkuntza Sailak ikastolen mugimenduarekiko?
J.L.A. Ikastolen mugimendua zentro pribatu eta publikoen federazio gisa ulertzen baldin badugu, begi-bistakoa dirudi hori ez dela posible. Galdera ikastola pribatuei buruz egina baldin bada, begi-bistakoa da hori egiteko ere erabateko askatasuna dutela.
A. Zer iritzi duzu EAJ eta Ikastolen Federazioko partaideen artean egon diren elkarrizketez?
J.L.A. Hezkuntza munduan kontsentsua lortzeko egiten den ahalegin oro kontuan hartu eta eskertzekoa da. Zentzu honetan, EAJk bere eginkizuna modu zuzenean bete duelakoan nago. Alderdi politikoen zeregina, oso emankorra izaten ari den hezkuntz politika kontsentsuatu baten aldeko apustua egin duen gobernu baten inguruko laguntza koordinatua dela iruditzen zait.
Amagoia Iban
23

GaiezGizarteaIrakaskuntzEskolakEuskal Esko
PertsonaiazAVILA1