Allande Boutin: «Saio laburra bada ere, urrats nagusia da euskara F3n ez baztertzeko»

ETBtik France 3-ra joan den Allande Boutin-i elkarrizketa
Allande Boutin: «Saio laburra bada ere, urrats nagusia da euskara F3n ez baztertzeko»

Euskal Telebistan hainbat urteko lana bete eta gero, Allande Boutinek Iparraldeko delegazioa utzi eta France 3ra (F3) jo du. Proiektu berri honetan bere helburua euskarazko saioak indartzea izaki, Akitaniako F3k telebista lokalak indartzeko eginiko ahaleginaz mintzatzen zaigu. «F3 Euskal Herri» saioa aurkezten du gaur egun. Udaberrirako Ipar Euskal Herri osoan ikusia izatea espero du.
ARGIA. Zein izan da France 3k eginiko apustu berria?
ALLANDE BOUTIN. Orain telebista txikiak indartzea du erronka. Hori dela eta, Estatu frantziarrean zehar 10 telebista txiki bultzatu ditu F3k. Baionan dugun ordezkaritzan 9 langile gaude, horietako lau euskaldunak.
A. Zein motatako saioa aurkezten duzu?
A.B. Egunero sei minutuko saioa aurkezten dugu eta «F3 Euskal Herri» du izena. 18.58etan hasten da eta Estatu frantziar osoan ikusten den albistegiari ematen dio sarrera.
A. Zein ezaugarri ditu?
A.B. Saio elebiduna da, baina euskarazkoa ez da frantsesezko berrien laburpena, bere izatea du eta zenbaitetan berri nagusia euskaraz emana da; saio laurdena da.
Oraingoan, adibidez, hauteskundeei buruzko informazioa eta elkarrizketak euskaraz egin ditut eta lehen aldia da euskaraz emanak direla Estatu frantziarreko telebista batean. Horrelakorik ez da egin orain arte hemen, eta oso laburra bada ere, lehen urratsa da. Ez da aurkezlerik, irudi hutsak, tituluen ondoren ahots batek irakurtzen ditu berriak.
A. Zer dela eta F3ren jarrera aldaketa hau?
A.B. Gure artean aspaldi eskatzen zen horrelako zerbait egitea, herriaren eta Kultur Erakundearen presioari esker lortu da. Eta oso harrera ona izan du. Izan ere, hamar herri telebistako ikusle harrera handiena lortu du, % 23k ikusten baitu egunero (eta une horretan telebista ikusten ari direnen % 57k). Erdal jendea ere, ez dago euskarazko saioaren aurka.
A. Zeintzu dira zure asmoak F3n?
A.B. Urrats bat besterik ez da. Zabaltzeko beste erredaktore euskaldunik topatu behar da. Oraingoz, edozein berri euskaraz eman daitekeela erakutsi dugu. Nire lana euskal eta erdal ikusentzuleen artean zubiak sortzea da. Aurrerantzean, magazin bat aurkeztu nahi nuke, hiru urtetara, ETBn egiten nuenaren antzekoa.
A. Nolako harremanak dituzue ETBrekin?
A.B. Oso onak, indarrak batu eta informazioa trukatzen dugu. Alferrik litzateke elkarren arteko konpetentzia eroan sartzea.
Ritxi Lizartza
63

GaiezKomunikabidTelebistaBesteak
PertsonaiazBOUTIN1
EgileezLIZARTZA2Komunikabid