«Informazio munduak kulturari tarte handia eskaini behar dio»

Jaime Otamendi, "Goizean Behin" irratsaioko aurkezlea:
«Informazio munduak kulturari tarte handia eskaini behar dio»
ARGIA. Zer tarte eskaini behar dio irratiak euskaz egiten den kulturari?
JAIME OTAMENDI. Informazio munduak kulturari tarte handi bat eskaini behar dio. Euskarazkoek batez ere. Zerbaitetan diferenteak izan behar badugu, gure diferentzia hor marka daiteke. Hemengo notiziak ematearekin batera, kultura berriak ere aitatu behar dira, kasu. Gure politika, informatibo guztietan, eta batez ere eguerdikoetan, ordu laurdeneko tartea egitea izan da. Eta aparte, orduroko albiste emankizunetan, kultur gaiak sartzea. Oskorrik adibidez hamabietan diskoa aurkezten badu ordu berean boletinean esan beharreko gauza da.
Magazineak, bestalde, zaku zabalak dira. Kultur saio zehatz batek baino arintasun gehiago eskaintzen dute. Ezkutu antzera ematen zaizkio gauzak. Idazlearekin elkar hizketa egiten da baina entzuleak gero badaki musika lasaia datorrela eta ondoren beste zerbait. Ez da ordubete kulturaz etengabe arituko den saioa.
A. Kultura gaiak tratatzeko tenorean konzentraziotik dispertsiora egin behar dela diozu?
J.O. Beste alor horietan euskal kultura normalizatzera jo behar dugula esaten dut. Bestelako apostuak egin behar direla kultura eremu berrietara zabaltzeko. Kulturak magazinetan eta informatiboetan soilik izango duen tokirik? Ez dut uste. Kultura saioak beharrezkoak dira, dudarik gabe. Formula berriak landatuta ordea.
A. Zein urrats eman ditu zentzu horretan Euskadi Irratiak?
J.O. Euskadi Irratian saiakera berezia egin da kulturarekin. Bereziki zaintzen den arloa da. Zuzendaritza bileretan kasik politika gaiei ematen zaien inportantzia ematen zaie. Momentu honetan kultur gaiei besteei jartzen zaizkien baliabide beretsuak jartzen zaizkie. Alde honetatik aurrerapausorik egon da. Hala ere, formulak estudiatzen horretan ikusi nahi nituzke aurrerapausoak. Literatura saioekin adibidez: ez dut uste asmatu dugunik, eta ziur nago asma daitekeela. Errazenera jotzen dugu. Arrazoi askorengatik. Jendeari kultura eskaintzeko moduetan asmatu beharrean gaude.
A. Bestelako bideak aukeratzen dituzte, ordea, irratiek. Gehiago jotzen da gauza arinetara, era berean kultura baztertzen delarik.
J.O. Madrilen aginduetara dauden irrati pribatuetan kulturak ez du batere lekurik. Kultura, hala ere are larriago baztertzen dute telebistan. Publizitatea da nagusi bakarra.
J.J. Petrikorena
45

GaiezKomunikabidIrratiaEuskadi irrEsatariak
GaiezKulturaBesteak
PertsonaiazOTAMENDI4