Andoni Tolosari elkarrizketa.
Andoni Tolosa: "Egin Irratiak emandako askatasuna ez nuke beste inon eskuratuko"
Andoni Tolosa "Egin Irratia"n goizeko saioa irekitzen duen irrati gizonak mikrofonoari errespetu handia zor badio ere, irratigintzatik urrun aritu nahi ez duen gaztea dugu. Gaua atsegin eta goizean goiz entzulego esnatzeak sortzen dion kontraesan eta saio beraz mintzatu zaigu.
ARGIA.– Ez da eskuarra irrati libre batetik irrati komertzial batera salto egitea. Azal iezaguzu zure esperientzia?
Andoni Tolosa.–Ni irrati librean, hau da, Hernaniko "Molotoff Irratia"n trebatu naiz eta "Egin Irratia" sortu berria zela eta, folk musika saio bat eskainiz agertu nintzen irrati horretan. Iazko udan bi hilabetez aritu nintzen eta hura pasa eta gero arratsaldeko 4etatik 6etara magazine bat edota goizeko 7etatik 8etako saioa eskaini zidaten. Inolako zalantzarik gabe goizekoa aukeratu nuen eta hementxe nabil bueltaka.
A.–Zergatik aukeratu zenuen goizeko saioa eta ez arratsaldekoa?
A.T.– Ordutegiak berak aukera handiagoa ematen duelako. Arratsaldeko bazkal osteko orduak motelak dira eta goizean bederen erdilotan dagoen jendearekin gustorago sentitzen naiz. Esnatzeko era asko dago; batzuk informatibo. Efemeride eta egunkarietako lehen orrialdeekin esnatzea nahiago dute, nik beste aukera bat eskaintzen dut, humorea eta berri bitxiak, saioa lo eta esna egon arteko zubi bat da, joku bat.
A.–Eta nola liteke poesia idazterakoan gau beltzaren ikuspegitik idaztea eta irrati saioa egiterakoan goizaren argitasunarekin topo egitea?
A.T.–Hauxe da irrati "Eginon" irrati saioa honek sortu didan kontraesan bakarra. Horretaz gain, bizitza soziala goizago bukatu behar izatera bultzatu nau baina...
A.–Baina zein irrati mundutik zatozen kontuan izanik, irrati komertzial batean gustora funtziona al dezakezu?
A.T.–Nik egiten dudana, nire kasa, nire gustoz egiten dut eta irrati komertzial baten mugak ezagutzen ditugu. Alde honetatik, "Egin Irratia"n askatasun osoa aurkitu dut eta entzulego artean espektru zabala dagoenez, eta entzulego beraren aurpegia ikusten ez dudanez, gustora egiten dut saioa. Are gehiago, "Euskadi Irratia" irrati instituzionalean edo beste batean banintz ez dut uste horrelako askatasunik nukeenik.
Irratia espresabidetzat hartzen dut, horrela ulertzen dut eta oraindik irratia zer den ikasten ari naiz. Mundu bat da, entzungarri egin dadin trikimailu asko dago eta horretan nabil, guzti hauek ikasten.
A.–Saioaren helburua zehaztuko al zeniguke?
A.T.–Hitz batez bitxia izatea. Erabiltzen dudan eskema euskara hutsezko beste saioetan ez da erabili eta "Egin Irratia"k eskainitako aukera probetxatu dut. Irrati hau gazte, berria eta egunez egun egiten ari den irratia da eta esperientzia berriak ezartzeko primerako aukera. Nire saioari sasi informatiboa deituko nioke.
A.–Gauez eskainiz gero saioren bat zein nolakoa egingo zenuke?
A.T.–Hamabietatik aurrera egingo nuke, musika eta idazle munduak nahastuko nituzke, sasi poesia... gauez lirikotasuna adieraztea errazagoa bait zait. Hala ere, ez dago proposamenik, beraz nire honetan darrait.
A. ETXEZAHARRETA.
63
GaiezKomunikabidIrratiaEgin Irrati
PertsonaiazTOLOSA2
EgileezETXEZAHARR2Komunikabid
