"Udaletxe txikietan ardatza idazkaria da"

Muxikako alkatea den Juan Kruz Galartzari elkarrizketa.

JUAN KRUZ GALARTZA
Muxikako alkatea
"Udaletxe txikietan ardatza idazkaria da"
Bere lana euskaraz burutzeko gai ez den idazkariaren izendapena atzera bota duten bederatzi alkateetarik bat da Juan Kruz Galartza, Muxikako alkatea. Idazkarien afera berri honi buruz aritu gara bere baserriko atarian.
Argia–Zer dela sortu dira arazoak idazkariaren kontu honekin?
Juan Kruz Galartza–Udaletxean pertsona bakarra dago 'Cuerpos de Habilitación Nacional' delakoaren arabera izendatzen dena, idazkaria. Beste pertsonal guztia guk aukeratu dezakegu, arkitektoak, peoiak, abokatua... baina idazkaria ez. Frankismoaren ondarea dela uste dut, ez dakit, frankismo garaian idazkariak gobernu zibilak herrietan zituen bitartekoak-edo izaten ziren, kontrolatzeko edo. Eta hori ez da bukatu oraindik.
A.–Esan al daiteke idazkaria dela udaletxe bateko langilerik garrantzitsuena?
J.K.G.–Batez ere herri txikietan, udaletxe handietan errekurtso gehiago dute. Atera kontuak: udaletxean idazkaria, administrazio-laguntzailea eta aguazila baino ez ditugu; alkatea figura bat besterik ez da, nik eguneko bederatzi orduz udaletxez kanpoko lanean iharduten dut. Beraz, udaletxeko lanen segimendu erreala egiten duena idazkaria da, berak markatzen du udaletxearen lan dinamika. Udaletxe txikietan, azken finean, ardatza bera da. Garbi dago halako funtzioa betetzen duen idazkariak euskalduna izan behar duela, zer gutxiago!
A.–Kontuan harturik gainera, Muxika ia erabat euskalduna dela...
J.K.G.–Bai, Muxikan 1.500 pertsona bizi bagara, 1.480 euskaldunak izango gara. 20ren bat dira euskaraz ez dakitenak, eta gainera Muxikan D ereduko eskola daukagu, hau da, erdaldun horien semeak euskaldunak dira. Nik erdaraz egiten dut, baina ez hain ondo, eta ni bezala jende askok, hemengo jendeak euskaraz erraztasun askoz handiagoa dugu. Beste gauza bat da gero sortzen diren gaiak, euskara administratiboa dela, euskara teknikoa dela... inork ez ditu ulertzen, baina zergatik? inoiz ez direlako egin. Idazkariari buruz... Muxikarako izendatu dutena euskaldun berria da, hitzegiteko gai da, baina bere lana ezin du bete euskaraz, orainarte euskaraz egiten ditugun lan guztietarako itzultzaile bat beharko genuke. Informeak, aktak eta abar euskaraz egiteko gai izan behar du idazkariak, maila hori eskatzen dugu.
A.–Zer gertatuko da orain idazkarien izendapena atzera bota duzuen alkateakin?
J.K.G.–Badirudi lege aldetik alkatea dela posesioa eman behar duena. Guk bilkura osoko akordioa daukagu, hiru alditan hartua. Azken batean, lege aldetik behintzat nire erantzunkizuna da, nik argi daukat gauza, eta eskertzekoa da gainera beste zinegotzi guztien jarrera ni apoiatzean. HBkoak hiru gara, EAkoak ere hiru dira eta EAJkoak beste hiru, eta guztiak bat datoz jarrera honekin.
Juan Kruz Galartza, Muxikako alkatea
24, 25

GaiezPolitikaEuskal HerrErakundeakUdalak
PertsonaiazGALARZA4
EgileezMURUA2Politika