Eskoria-tza: "Joan eta jo, egun bakarrean grabatuta"
Lau gazteren artean osatzen dute "Eskoria-tza" hard-core taldea, eta izen bera izango du laster batean Basati Diskak etxeak kaleratuko duen extended play plastikoak: sei kantu bizkor, orotara hamaika minutu eta piku. Bost urteren buruan agertu duten amorrazio konzentratua.
Baxuaren tentsioz (Pepe) eta bateriaren arrapaladan (Suso) kitarrak egiten du tarrata lehorra (Errasti). Sekula garbi entzuten ez den Xabinen ahotsak eusten dio arrapostuka: "gure senadore ta presidentia, denok larrua joten, ze energia polita, gure senadore ta presidentia". Sei kantu bilduko ditu Basati Diskak kaleratuko duen plastikoak: Sodomia, Azken Gerra, Gorrotoa, Sentimentala, Demokrazia eta Neurosia; seirak EP (extended play) batetan.
EP plastikoa single baten tamainakoa da, baina iraupen luzekoa, alde bakoitzeko sei-zazpi minutu gorde ahal dituena, eta guk dakigula Euskal Herrian halakorik argitaratuko den estrainekoa.
Eskoria-tza 1984. urtean sortu zen, lau kideek hamabost urte inguru baino ez zituztela, lehenetarikoak gainera hard-corean entsaiatzen hasiko zirenak.
'Sodomia' Reagan-en administrazioak sodomia debekatzen zuen legea atera zuenean sortu zen, "ze beldurra IHESari! Hori izan zen Peperekin ateratako bigarren abestia, eta 'Demobrazia' lehenengoa". 'Sodomia' eta 'Azken Gerra' bertsioak dira, "Holandako zinta hard-core batzutan entzun genituen, motelago jota noski. 'Azken Gerra' amorru leherketa bat da, 'gerra zikina, nuklearra, mila bonba jauziko dira...'". 'Gorrotoa'k sarrera batez aurkezten da abiadura itzelean abiatzeko gero, "Errastik goitik behera atera zuen". 'Sentimentala', "gehien gustaten jatena, preziosa, sentimenduz betea. Lagun bat hil zen egunean egin genuen, eta ezin da esplikatu daukon guztia".