Maribel Belastegi antzerkilariari elkarrizketa
Maribel Belastegi: "Bertolt Brecht Ezagutu Behar Da Teatro Politikoa Zertan Den Jakiteko"
ARGIA.–Arrazoi berezirik izan da "Transito Bat"ek Bertolt Brecht-en obra baten taularaketari heltzeko?
MARIBEL BELASTEGl.–Ba, ordua delako, ezta? Tira, Brecht-i errespetu handia diot, eta bestalde "Ezteiak" bezalako obra baten adaptazioa ongi egokitzen zaio gure antzerkia egiteko manera eta ezaugarriei. Dibertigarria gertatuko da eta aldi berean egurra partitzen du toki guztitatik. Bertolt Brecht-ek bere hasierako bolada anarkista samarrean idatzi zuen obra hau, dadá eta expresionismoaren tarte horretan, eta hori igerri egiten da: ezkontzaren instituzioa hankaz gora utziko du, deskalabru batetik abiatu eta erabateko zorakerian amaitzeko.
Gainera, ez da «Baul» edo "Madre Coraje" izan daitezkeen bezain estuak kokapen historikoari eta politikoari dagokienez –Alemaniak egindako ehun urtetako gerrateak–, eta horrela rekreazioak egiteko aukera ugari eskeintzen ditu «Ezteiak» lanak. Areago oraindik, nekazal mundutik jaso dugun moralaren aurrean gauza asko auzitan ipiniko dituela pentsatzen dut.
A.–Zer kontatzen da ordea "Ezteiak"en.
M.B.–Burges txikien ezkontza bat, ezkontza bazkaria. Ordu eta laurdeneko obra da. Bikote bat ezkontzen da, bazkarian bertan beste gaztetxo bikote bat sortzen da, zazpi urte ezkonduta dagoen eta elkar ezin ikusi duen hirugarren bikote bat ere bada, eta azkenik ezkongaietariko baten aita eta bestearen ama. Hasiera batetik somatzen da koktel latz bat lehertzear dagoela. Gizarte mailaz gora egin nahi duen burges taldearen erretratuaren aurrean aurkituko gara: dena da itxuraz ederra, baina koloka izugarri batetan mantentzen salatzen dena, azken batean bertan behera erortzeko.
A.–Lehen esan duzu badela ordua Bertolt Brecht egiteko!
M.B.–Brecht ia sekula ongi egin ez delako. Eta egun ez da egiten gainera. Teatro politikoa zertan den jakiteko Bertolt Brecht ezagutu behar da, eta, jakina, guk ezin dugu ideologia politikoa alde batetara utzi Euskal Herrian. Eskerrak!
A.–Obra honen beste bertsiorik egin ahal da orain arte?
M.B.–Bai, Estatu espainolean benetan bertsio onak egin izan dira. Neroni ere bertsio horietako batetan oinarritu naiz neurri handi batetan, Brecht beraz gain. «Los Goliardos» taldeak egin zuen Madrilen 1973. urtean, eta gero Estatu osoan barrena. Eredu paregabea dela aitortu behar dut. Gero baita ere, uste dut Gasteizko talde batek ere taularatu zuela beste bertsio bat, baina ez nuen hura ikusi ahal izan.
Lehen aldia izango da beraz euskaraz egiten dela, aldez aurretik Brecht-en zeozer egin den arren. Testu on bat ekarriko dugula iruditzen zait.
G.A.
Bertalt Brecht-ek 20. hamarkadan izkiriatu zuen "Ezteiak".
47
GaiezKulturaAntzerkiaAktoreak
PertsonaiazBELASTEGI1
