Txillardegiri elkarrizketa
Txillardegi: "Ez diogu Euskaltzaindiari Lekua Hartu Nahi"
ARGIA.–Azentoari buruzko Kongresua, ideiaren lehen urratsak zertan izan dira?
TXILLARDEGI.–Egia esan, Durangoko bileren ondoren sortu zen ideia. Durangoko bilerak iaz egin ziren, eta azentoari buruzko erabakiren bat hartzea zuten helburu. Beste bilera batzu ere montatu zituen Euskaltzaindiak, hauek Euskal Ahoskera Batuari buruz eta esan behar han ez zela gauza handirik erabaki. Beraz, urtea bete da hain juxtu ere, Durangon ginenak (han zeuden ETB eta Eusko Irratiakoak, AEK, eta euskal munduan gabiltzanak, denetara hogeitamarren bat lagun) pentsatu genuen segitun egin behar genuela beste bilera bat, eta zerbait erabaki, ze Euskaltzaindiak ez bazuen erabakirik hartu nahi edo ez bazuen uste gauzak prest zeudenik holakorik montatzeko, ba bueno, geuk hartuko genuela.
A.–Eta azentoarena erabakitzearen beharra zertan nabaritu duzue, zer. gatik dago erabaki beharra?
TX.–Uste dut euskararen inguruko munduak eta batez ere euskararen irakaskuntzan mugitzen den jendea kezka dabil, eman dezagun AEKkoak. Orain dela gutxi adibidez "Ele" AEKkoen errebistan idatzi nuen azentoari buruz, eskatu zideten eta. Hori guztiz beharrezkotzat jotzen dute irakaskuntza mailan eta euskararen munduan dabiltzanak, Euskal Telebista eta Irratikoak ere askotan esan ohi dute heurak ez dakitela nola jokatu askotan eta horrelakoak. Orduan, edozeinek egin dezake azterketa bat, batez ere linguista bada, eta berehala ikusten da hortik esaten dena, zera hori:"Bilbokoen azentoa edo Bizkaiko azentoa" eta beno, ez da inondik ere Bizkaiko azentoa. Hain zuzen ere Julen Kalzada edo Amuriza bizkaitarrak dira eta ez dute batere azenturik; hori sortu da euskaldunberrien artean.
A.–Ze jende agertuko da handik, agertuko da hizkuntzalari ospetsuren bat ala beste maila batean planteatu da?
TX.-Guk ideia zabaldu diegu euskal azentoaren munduan zerbait esan dezateken, enfin, jende guztiari. Esate baterako gonbidatu dugu Mitxelena, noski, eta era berean baita Haritxelar eta horrelako jendea. gero euskal filologiaren munduan dabiltzenei, bai Gasteizko bai Deustoko eta Donostiako EUTGkoei. AEKkoei, Mari Karmen Garmendiari ere esan zitzaion, neronek esan nien, eta nahi zuten pertsona bidaltzeko, HABEkoak ere gonbidatu ditugu eta beste jende bat ere deitu dugu. Beraz, hogeita bost lagun horiei bidaliko zaie dokumentazio guzti hori: 400 bat folio dira, jendea jakinengainean joan dedin eta orduan, mintegi horretan egunero egunean eguneko gaia aztertuko da. Hori fijaturik dago ez dakit merezi duen konkretatzerik.
A.–Batzuk Batzarre horretan Euskaltzaindiari lekua hartzeko saioa ikusiko dute agian.
TX.–Gure asmoa ez da inondik inora Euskaltzaindiari lekua hartzea. Hori harrokeria bat izango litzateke gure aldetik. Gure asmoa da Baionan orain dela hogeitahiru urte nolabait berriz egitea: proposamen bat, eta ea Euskaltzaindiak eta ea jendea zer dioen. Ez da erabakirik hartuko baina propasamen batzu egingo ditugu, hori bai.
57
GaiezGizarteaIrakaskuntzUnibertsitaUEU
PertsonaiazTXILLARDEGI
