"Hamar Mana Minduak", Hiruak Bat taldearen Emaitza Berri, Ongi-Etorri Eta Nobedosoa
Badira hemezortzi urte Hiruak Bat taldea sortu zela Garazi aldean, hiru herrietako gazteak bilduz. Hainbat urtetan urtero lan berriak aurkezten ibiliak, aurten ere produitu freskoa prestatu digute: "Hamar manu minduak".
Ortzirale honetan izanen da estreinaldia, hilaren San Garazin eta gaueko 9,30tan. Behingoz esango dugu: joan beharra dago ikustera, merezi du eta. Geuk aurre-estreinaldia dastatzeko aukera izan genuen, eta izugarri libertitu ginen Guillaume Irigoyenen luma gaztetik sortutako hirugarren lan honekin. Irisarriko antzoki ttikian izan zen aipatu saioa, taldeak usaian errepetizioneetarako erabiltzen duen horretan hain zuzen.
Hauxe da antzerki lan berri honen gaia: Beñat Pekogain protagonista Iparraldeko herri ttipi batera iristen da, eta bertako errealitatean txertatu beharra dauka, gorabehera eta katramila guztietan sakonetik murgildurik kausitzen delarik. Hautua egin beharrak mila burukomin ekarriko dizkio gure Beñati.
Lanari oso umore freskoa dario, batik bat Iparraldeko umore-ohiturarekin biziki ongi lotzen dena. Umorezko istorio horrek aitzakia ematen die Hiruak Batekoei, gaur egungo errealitateaz hainbat oharpen sarkastiko eta kritika zorrotz egiteko. Antzezleak bizi diren inguruko erretratu engaiatu eta sarkastikoa dugu "Hamar mana minduak". Inola ere pasatzen utzi ezin daitekeena.