Karmelo Landa: "Hau ez da omenaldi bat, lekukoa jaso eta pasatzea baizik"
1986ko urriaren 26a
"Laster beteko dira hamabi urte Gabriel Aresti hil zenetik, eta gogoan ditut idazleen sakralizazioaz aipatu izan direnak, besteak beste Joseba Sarrionandiak "Ni ez naiz hemengoa"n zioena. Arestiren lana jaso eta prestatzerakoun, guk ez dugu omenaldi bat atondu. Ez diogu aitaren etxeari, inguruko arkitekturarekin homologatua gelditu dadin, ezpal, ertz edo punta zorrotzik leunduko". Hitz hauekin laburtzen du Karmelo Landak Gabriel Arestiren literatur lanen edizioa prestatu duen taldearen asmoa.
Informazio-Zientzien Fakultatean literaturazko irakasle den Karmelo Landa aspaldian ari da Arestiren obra aztertzen; horretan ziharduela ikusi zuen idazle bilbotarraren obra eta alderdi ugari gordetzen zela oraindik itzalpean, publikatu gabe eta hor-hemenka sakabanaturik. Edizio osoaren ideia proiektu bilakatu zen bost pertsonen taldea osatu zutenean, duela jada urte bete.
Lehen momentutik hartu genuen xedetzat edizio guztiz zehatza prestatzea, Arestiren lumatik sortua jatorrizko bertsioan jaso eta modu oso zehatz eta fidagarriz eskaini ahal izateko, horretarako, alde batera utzi ditugu ondoren egindako itzulpen eta moldaketak, eta Arestik berak bertsio desberdinetan eman zituen lanen kasuan, jatorrizkoaren ondoan beste bertsioak ere eskainiko ditugu. Lanen urtea, ingurua, bertsioak...,garrantzizko diren datu guztiak oharren bitartez eskainiko ditugu.
Baina literatur lan espezifikoez gain, nolabait esatearren, azpimarratu nahi nuke artikuluek, hitzaldiek eta gutunek duten interesa, guzti hauek balio handikoak baitira, ez soilik Arsetiren irudi-nahiko-hautsia osatzeko, baita eztabaida, motibo eta kultur-gai bizi ugari ukitzen dutelako, eta beti ere Atestik zuen ikuspegi eta jarrera txit bizkor eta kritikotik. Neu behintzat txundituta gelditu nainz hitzaldiak irakurtzerakoan... oso aberatsak dira, oso sujerigarriak. Gainera, une oso esanguratsuetan gertatu ziren: hor daude Hernanin, Tolosan eta Ondarroan emandakoak, Baionakoa, Bartzelonako Unibertsitatean emana, eta beste asko.
Baina azken finean gure ahalegina guzti hori modurik egokienean jende aurrean jartzera bideratzen da. Gero, irakurri eta jendeak izango du hitza.